Snemma dags glumdi harmonikkutónlist úr sal skólans. Þegar betur var að gáð voru nemendur í 2. – 3. bekk að æfa þjóðdansa með kennrurunum sínum því að þeir eru að vinna að verkefni um þessar mundir sem heitir "land og þjóð". Liður í því verkefni er að kynnast gömlum hefðum eins og þjóðdönsum og þjóðbúningum en í salnum í morgun mátti einmitt sjá tvær uppábúnar konur í þjóðbúningi og eina stúlku í 3. bekk. Krakkarnir höfðu auðsjáanlega gaman að því að dansa hringdans og marsera. Fleiri myndir.
Að undanförnu hefur öryggi barna og unglinga á Netinu mikið verið til umræðu. Þrátt fyrir að margt gott sé að finna á Netinu er þar líka ýmislegt sem þarf að varast og þar geta þrifist hættuleg og neikvæð samskipti. Að þessu tilefni hafa samtökin Heimili og skóli sett af stað vakningarverkefni um jákvæða og örugga notkun barna og unglinga á Netinu. Vakningarverkefnið felst í kynningum fyrir nemendur og foreldra þeirra.´
Í næstu viku verða fundir fyrir nemendur í 5. – 10. bekk hér í Salaskóla og þriðjudaginn 3. mars eru foreldrar boðaðir til fundar kl. 8:00 – 9:00.
Internetið er frábær upplýsingaveita og tæki til samskipta en þar felast einnig ýmsar hættur sem mikilvægt er fyrir foreldra að þekkja og gera sér grein fyrir. Til að foreldrar geti talað við börnin sín og leiðbeint þeim um öryggi og góða hegðun þurfa þeir að þekkja það umhverfi sem þeir eru í dags daglega. Leiðbeiningar um "umferðarreglur" á netinu eru því orðinn einskonar hluti af uppeldishlutverkinu.
Á fyrirlestrinum verður farið í gegnum svipaða hluti og með nemendum, en einnig rætt hvernig foreldrar sjá netnotkun barnanna sinna og svo hvernig börnin upplifa netnotkun sína og samskipti sín við foreldra. Á fyrirlestrinum verður farið í gegnum bloggsíður, tölfræðilegar upplýsingar, msn einelti, netið og friðhelgi einkalífsins, netvini, nettælingu og ræða aðeins um kynslóðabilið þ.e. hvers vegna foreldrar skilja ekki tölvunotkun barna sinna.
Við hvetjum foreldra til að mæta á þennan fund.
Vinaviku er lokið og það er álit manna að vel hafi tekist til. Vinabekkir heimsóttu hvern annan og unnu að ýmsum skemmtilegum verkefnum í skólanum. í lokin voru svo vinbekkirnir kallaðir saman á sal þar sem farið var í leiki sem tengdust vináttu og hjálpsemi. Eldri nemendur voru einstaklega ábyrgðarfullir og sýndu þeim yngri mikla umhyggju. Í myndasafni skólans er fjöldi mynda frá vinavikunni.
Á öskudag verður skemmtun í Salaskóla fyrir alla krakka í 1. – 7. bekk. Hún hefst kl. 13:00 og lýkur kl. 14:30. Allir eiga að mæta í grímubúningi eða öðruvísi en venjulega. Stiginn verður dans, farið í leiki, valinn frumlegasti búningurinn og svo er hægt að fá andlitsmálun fyrir þá sem vilja.
Að þessari skemmtun standa Foreldrafélagið, Salaskóli og Fönix.
Þessa vikuna er svokölluð vinavika í Salaskóla. Þá þurfa allir að finna sér vinabekk, 2 – 3 bekkir saman, gjarnan á ólíkum aldri og vinna saman að skemmtilegum verkefnum. Dæmi eru um sameiginleg listaverk og gerð vinabanda. Einnig er vinþema gjarnan fléttað inn í kennsluna þannig að hver og einn nemandi geri einstaklingsverkefni sem tengist vinavikunni. Þemavikunni lýkur á föstudaginn með því að vinabekkirnir hittast í hátíðarsal skólans þar sem farið verður í leiki undir handleiðslu Olweusarteymisins.
Föstudaginn 6. febrúar voru 1. bekkingar búnir að vera 100 daga í skólanum. Þá var haldin hátíð og unnið með töluna 100 á mismunandi hátt. Kórónur útbúnar með 100 á, talið 10 sinnum upp í tíu með mismunandi góðgæti og fleira. Í myndasafni eru myndir frá hundraðdagahátíðinni.
Á miðvikudögum eru Maríuerlur og Steindeplar í samstarfi. Þeir tímar eru kallaðir lestin. Þá er bekkjunum blandað saman og síðan skipt í þrjá hópa. Þá koma fleiri kennarar að hópunum. Unnið er að verklegum viðfangsefnum sem tengjast stærðfræðinni svo sem talnalínu, tugum og einingum. Útikennslan verður svo tengd við þau viðfangsefni sem tekin eru fyrir. Hóparnir eru: rauði hópurinn, blái hópurinn og guli hópurinn eins og litirnir á lestinni. Þau fara í einn hring og prófa öll viðfangsefni. Ánægjan leynir sér ekki á myndum sem smellt var af nemendum á dögunum.
Þrjú stúlknalið fóru á Íslandsmeistarmót í skák núna um helgina. Mótið var haldið hér í Salaskóla. Úrslit urðu á þann veg að Salaskóli vann í flokki A liða, B liða og C liða. Öll liðin okkar voru efst að stigum sem er frábær árangur hjá stelpunum. Í einstaklingskeppni varð Jóhanna Björg Jóhannsdóttir, nemandi í 10. bekk, Íslandsmeistari stúlkna í eldri flokki (fæddar 1993-95) sem er stórglæsileg frammistaða. Hægt er að lesa nánar um úrslitin á skak.is.
Stúlknaliðin voru þannig skipuð:
A-sveit. 1. Jóhanna Björg, 10.bekk
2. Hildur Berglin, Ritum
3. Guðbjörg Lilja Svavarsd, Hávellum
4. Erna María Svavarsd, Súlum.
B-sveit. 1. Una Sól, Ritum
2. Anastasia, 9. bekk
3. Rebekka Ósk Svavarsd, Kríum
4. Heiða, Mávum
2. Freyja, Hrossagaukum
3. Móey, Hrossagaukum
4. Hulda Clara, Steindeplum
Varamenn í C-sveit: Lana Kristín, Þröstum
Hildur María, Steindeplum.
Inn á myndasíðu skólans er kominn linkur sem sýnir sýnishorn af verkum nemenda í textílmennt. Það er þess virði að kíkja og skoða sig um.
