Nemendur Salaskóla tóku nýverið þátt í Ólympíuhlaupi ÍSÍ, en hlaupið er jafnframt Góðgerðahlaup Salaskóla. Ár hvert safna nemendur styrk frá foreldrum og öðrum velunnurum skólans í nærumhverfinu og gefa þá upphæð sem safnast til góðgerðamála. Í ár var ákveðið að styrkja Grænuhlíð fjölskyldumiðstöð. Alls söfnuðust kr. 130.000- í hlaupinu og afhentum við Grænuhlíð styrkinn áðan.

Áður hafa nemendur Salaskóla styrkt eftirfarandi góðgerðafélög:

2023 Félag barna með krabbamein

2024 Styrktarsjóður Bryndísar Klöru

2025 Downsfélagið

Vel gert Salaskóli! ❤

🎉 Þvílík hátíð í Salaskóla! 🎉

25 ára afmæli Salaskóla var einstaklega vel heppnað og mikil gleði og ánægja ríkti hjá nemendum og gestum. Þrátt fyrir rigninguna var brugðið á ráð og plan B galdrað fram og hátíðin hélt áfram! ☔️✨

Gestir okkar voru sérstaklega ánægðir með falleg listaverk, skemmtilegar uppsetningar og jákvæð skilaboð sem prýddu skólann. Nemendur stóðu stoltir og glöð við hlið foreldra sinna og sýndu þeim skólann sinn. Það var sannkölluð gleði og stoltið skein úr hverju andliti. 🥰

Takk fyrir frábæran dag og fyrir alla sem lögðu sitt af mörkum til að gera hátíðina að stórkostlegum viðburði! ❤️

Föstudaginn 4. september verður Treyjudagurinn haldinn í fyrsta sinn á Íslandi. Markmið dagsins er að sýna börnum með krabbamein og fjölskyldum þeirra stuðning með því að klæðast uppáhaldstreyjunni sinni og minna á að við erum öll í sama liði.

Salaskóli tekur að sjálfsögðu þátt í átakinu og hvetur nemendur og starfsfólk til að mæta í treyju þennan dag.

Að baki deginum stendur Börn með krabbamein, styrktarfélag, sem styður börn með krabbamein og fjölskyldur þeirra á margvíslegan hátt. Á Íslandi greinist að meðaltali eitt barn í hverjum mánuði með krabbamein.

Við hvetjum jafnframt foreldra , starfsfólk og aðstandendur til að kynna sér átakið og styðja þetta verðuga málefni eftir eigin getu. Saman getum við sýnt samstöðu með þeim börnum og fjölskyldum sem takast á við erfið veikindi.

💙💙💙Nánari upplýsingar má finna á  www.treyjudagur.is 💙💙💙

Undanfarna daga hafa nemendur á unglingastigi verið að vinna að lokaverkefnum sínum þetta skólaárið, en þetta hefur verið hefð hér í Salaskóla undanfarin ár.

Lokaverkefni 8. bekkjar hefur snúist um að gera góðverk sem eftir hefur verið tekið í nærsamfélaginu sem og víðar. 

Nemendur í 9. bekk hafa í lokaverkefni sínu verið að hanna matarvagna; setja sama matseðla, rekstraráætlun, líkön, útbúa markaðsefni og fleira. 

Nemendur í 10. bekkur hafa í sínu lokaverkefni verið að vinna að nýsköpunarverkefni þar sem þau hanna vöru og útbúa viðskiptaáætlun. 

Þemadagarnir heppnuðust einstaklega vel og einkenndust af skapandi starfi, samvinnu og góðum anda. Nemendur lögðu sig öll fram við að undirbúa 25 ára afmæli skólans sem haldið verður í haust, og mátti greinilega sjá metnað og gleði í vinnunni.

Afrakstur þessarar vinnu verður svo til sýnis á afmælishátíðinni. Dagurinn í gær endaði á einstaklega fallegum nótum með einni stórri hópmyndatöku og söng á skólalóðinni😊

Alþjóðlegur dagur downs heilkennis er laugardaginn 21. mars nk. 

Við í Salaskóla munum halda upp á daginn núna á föstudaginn,  þ.e. 20. mars.

Markmið dagsins er að vekja athygli á fjölbreytileika samfélagsins okkar. Í tilefni dagsins hvetjum við alla nemendur og starfsfólk til að mæta í mislitum sokkum. 

Við hlökkum til að sjá skólann fyllast af litríkum sokkum og gleði þegar við fögnum fjölbreytileikanum saman.

Sumarfrístund fyrir verðandi 1. bekkinga verður fyrir skólabyrjun í ágúst 2026.
Frístundin verður í tvær vikur fyrir skólabyrjun, dagana 10.-14. ágúst og 17.-21. ágúst.

Skólasetning verður þriðjudaginn 25. ágúst – sjá skóladagatal á heimasíðu Salaskóla.

Skráningar í sumarfrístund verða auglýstar nánar þegar nær dregur og fyrir liggur staðfesting á innritunum nemenda í grunnskóla.

Stóra upplestrarkeppnin! 📚
Í dag fór fram upplestrarhátíð í Salaskóla, en hún er undankeppni 7. bekkinga fyrir lokahátíð Stóru upplestrarkeppninnar í Kópavogi sem haldin verður í lok mars í Salnum.

Nemendahópurinn stóð sig með stakri prýði og ljóst að æfingar í upplestri, framsögn og túlkun hafa svo sannarlega skilað sér.
Þrír nemendur voru valdir sem fulltrúar Salaskóla, þær Ella Sif og Embla Dröfn sem aðalmenn og Snædís sem varamaður. Þær hefja nú undirbúning og æfingar og við vitum að þær verða verðugir fulltrúar okkar á lokahátíðinni.
Dómarar voru Kristín skólastjóri, Stefán kennari á unglingastigi og Guðmundur Karl prestur í Lindakirkju.
Það voru kennararnir Hrafnhildur og Sigurlaug og Hulda deildarstjóri sem höfðu veg og vanda að undirbúningi upplestrarhátíðarinnar.
Til hamingju Ella Sif, Embla Dröfn og Snædís!

Hér má fara beint inn á slóðina: https://island.is/umsoknir/grunnskoli

Þann 20. janúar fór fram verðlaunaafhending Fjölgreindaleika Salaskóla sem haldnir voru dagana 6. og 7. nóvember síðastliðinn. Þrjú stigahæstu liðin hlutu verðlaunapening og stigahæstu fyrirliðarnir voru sérstaklega heiðraðir með bíóferð.

Við erum ákaflega stolt af nemendum okkar sem stóðu sig glimrandi vel á Fjölgreindaleikunum. Þau sýndu fjölbreytta hæfni, dugnað og jákvætt viðmót og lögðu öll sitt af mörkum sem varð til þess að leikarnir heppnuðust einstaklega vel.

Fyrirliðar liðanna, elstu nemendurnir,  eiga einnig mikið hrós skilið. Þau voru öflugar fyrirmyndir, sýndu frábæra hópstjórn, ábyrgð, hlýju og hvetjandi viðmót. Fyrirliðar gegna lykilhlutverki í Fjölgreindaleikunum þar sem eldri nemendur leiða þá yngri áfram, skapa öryggi, efla samvinnu og leggja grunn að jákvæðum samskiptum.

Fjölgreindaleikarnir eru skemmtilegir og gefandi dagar þar sem nemendur blómstra á fjölbreyttan hátt, vinna saman í aldursblönduðum hópum og mynda ný vinatengsl, í anda vináttu, virðingar og samstarfs sem eru einkunnarorð Salaskóla. 

Til hamingju allir þátttakendur og takk fyrir frábæra Fjölgreindaleika 🙂