Bebras (Bifur) áskorunin

Bebras (Bifur) – áskorunin í rökhugsun & tölvufærni

Nemendur í 4.-10.bekk í Salaskóla stefna á að taka þátt í Bebras-áskoruninni að þessu sinni en Bebras tölvuáskorunin 2020 fer fram í vikunni 9.-13. nóvember 2020. Áskorunin er alþjóðlegt verkefni og er henni ætlað að kynna hugmyndafræði og grunnhugsun forritunar (e. computational thinking) fyrir nemendum með því að fá þá til að leysa krefjandi og skemmtileg verkefni.

Bebras var upphaflega stofnað af Prófessor Valentina Dagiene hjá Háskólanum í Vilnius, en Bebras (e. Beaver) er heitið á dýrinu bifur á litháísku. Bebras er ætlað að vekja áhuga nemenda á því að kynnast upplýsingatækni. Valentina ákvað að nýta bifur sem ímynd áskoruninnar vegna þess dugnaðar og fullkomnunaráráttu sem þeir virðast hafa. Bifrar eru duglegir, vinnusamir og gáfaðir; og þeir vinna stöðugt í stíflunum sínum, bæði til að gera þær betri og stærri. Fyrsta Bebras áskorunin var í Litháen árið 2004 en áskorunin hefur stækkað gríðarlega á stuttum tíma og er hún ein fjölmennasta áskorun sem notuð er til kennslu í upplýsingatækni.

Söfnum hausti

Menningarhúsin tóku sig til og græjuðu ljósmyndaleik fyrir vetrarfríið í næstu viku undir yfirskriftinni Söfnum hausti. Þar eru fjölskyldur hvattar til að fara út í haustið – búa til haustkórónur og laufaskúlptúra, virða fyrir sér fugla og útsýni, faðma tré og bregða á leik á ýmsan hátt. Þær taka af sér mynd – eða fá einhvern til að taka af sér mynd – og deila á samfélagsmiðlum undir myllumerkinu #söfnumhausti.

Þess má geta að nokkrir þátttakendur / myndasmiðir munu hreppa glaðning

Hér er hlekkur á leikinn eða sjá mynd hér fyrir neðan

Bleikur dagur þann 16.október

Það er bleikur dagur núna á föstudaginn. Kennarar og starfsfólk skólans ætla því að mæta í bleikum fötum í tilefni dagsins og hvetjum við nemendur til þess að gera það líka. Þannig lýsum við upp skammdegið í bleikum ljóma svo allar konur sem greinst hafa með krabbamein finni stuðning okkar og samstöðu.

https://www.bleikaslaufan.is/um-atakid/bleiki-dagurinn/

Ólympíuhlaup ÍSÍ 2020

Föstudaginn 11.september er Ólympíuhlaup ÍSÍ frá kl. 11:00 -13:00 hér í Salaskóla.
Hlaupið hefst stundvíslega klukkan 11:00 og lýkur klukkan 13:00.Ræst verður í hollum klukkan 11:00. Nemendur á unglingastigi leggja fyrst af stað, næst fer miðstig og síðast yngsta stig.
Hringurinn sem nemendur fara í Ólympíuhlaup ÍSÍ er 2.5 km. Þess má geta að nemendur hlaupa eða ganga sama hring og í fyrra. Vert er að nefna að nemendur geta valið hversu marga hringi þeir hlaupa.

Eftirfarandi reglur eru til viðmiðunar fyrir hvern árgang:

Nemendur í 8. – 10. bekk hlaupa 2-4. hringi (5 – 10 km).

Nemendur í 4. – 7. bekk hlaupa 1-4. Hringi (2.5 – 10 km).

Nemendur í 2. – 3. bekk hlaupa 1-2 hringi (2.5 – 5 km).

Nemendur í 1. bekk hlaupa 1 hring með umsjónakennara. (2.5 km).

Við viljum brýna fyrir foreldrum að nemendur séu klæddir eftir veðri, í góðum skóm og fatnaði til hreyfingar. Við hvetjum alla nemendur til að koma með merktan vatnsbrúsa.

Að loknu hlaupi eða frá kl 12:00 ætlar skólinn að bjóða upp á grillaðar pylsur fyrir alla.

Samrómur – Salaskóli í öðru sæti

Salaskóli var í öðru sæti í Lestrarkeppni grunnskólanna á síðunni samromur.is á meðal grunnskóla með fleiri en 450 nemendur. Í heildina lásu nemendur, kennarar og foreldrar 4 þúsund setningar.

Keppnin var haldin til þess að safna upptökum af lestri barna og unglinga sem verða notaðar til þess að kenna tölvum og tækjum íslenska tungu. Nemendur í Salaskóla hafa því lagt mikilvægt lóð á vogarskálarnar til að styrkja stöðu íslensku í stafrænum heimi.

Til hamingju nemendur, kennarar og foreldrar barna í Salaskóla með árangurinn.

Hér koma myndir frá því þegar nemendur og höfundar Samróms komu við í Salaskóla og afhentu fyrir hönd Salaskóla, Ásu, Hafsteini og nemendum í 4.bekk viðurkenningaskjal og fimm Sphero bolt vélmenni.