Upplýsingamennt á að vera samþætt öllum námsgreinum í skólanum og nýtast bæði kennurum og nemendum í öllu þeirra starfi.  Í upplýsingamennt felst m.a. að geta leitað sér upplýsinga t.d. í bókum eða á vefnum, unnið úr upplýsingunum til að setja fram á aðgengilegan og skemmtilegan hátt fyrir aðra. Allir nemendur í Salaskóla eru að gera eitthvað í þessu veru og sum verkefni þeirra er hægt að sjá á síðunni Upplýsingamennt í Salaskóla undir flipanum Skólinn.
Þriðjubekkingar voru einmitt að klára verkefni á dögunum þar sem reyndi á upplýsingaleikni og úrvinnslu upplýsinga ásamt því að þurfa að vera býsna glögg/glöggur á liti, form og hvernig myndir birtast. Þau fjölluðu hvert og eitt um áhugamálin sín og hver nemandi bjó til sína eigin sýningu í forritinu Photostory. Verkefnin má sjá hér. Fleiri verkefni eru á leiðinni á síðuna.

Nemendur í 10. bekk verða útskrifaðir miðvikudaginn 6. júní og hefur foreldrum verið sent bréf þar um. Nemendur í 1. – 9. bekk eiga að mæta til skólaslita fimmtudaginn 7. júní og hefur bekkjum verið skipt upp í tvo hópa, annar hópurinn mætir kl. 10:00 en hinn kl. 10:30. Mæting er í anddyri skólans þar sem umsjónarkennarar taka á móti þeim. Hópskipting er sem hér segir:

Krakkarnir í unglingadeild skólans tóku fyrir mannréttindi og SOS Barnaþorpin sem þemaverkefni nú í vor – er lauk formlega með söfnun á opna deginum hér í skólanum. Þar seldu þau kaffi og kökur og höfðu einnig til sölu svokallaðar trönum sem eru pappírsfuglar sem eru brotnir á ákveðinn hátt. Trönurnar voru að sjálfsögðu búnar til hér í skólanum og mikið kapp lagt við verkefnið.  Söfnunin gekk gríðarlega vel því alls söfnuðust um kr. 140.000.- Ragnar Schram frá SOS Barnaþorpum á Íslandi var boðaður í heimsókn í morgun, 29. maí,  og honum afhent umslagið með peningunum ásamt kveðju frá Salaskóla. Ragnar fræddi krakkana í leiðinni um SOS barnaþorpin, hvernig þau urðu til, skipulag þeirra og þá uppbyggingu sem á sér stað í tengslum við þau. Það er ljóst að styrkurinn frá Salaskóla fer í að styrkja 3 þorp í eitt ár, eitt í Haíti, annað í Afríku og það þriðja í Tailandi. Það er aldrei að vita nema framhald verði á þessu verkefni í framtíðinni. Í lok afhendingar var slegið upp veislu með muffins sem Reynir bakari gaf krökkunum fyrir dugnaðinn. Sjá einnig frétt á heimasíðu SOS Barnaþorpin á Íslandi  http://www.sos.is/frettir/nr/1125

Í vikunni mynduðu allir nemendur Salaskóla kór í lagi með Fjallabræðrum sem er væntanlegt. Fjalalbræður hafa það að markmiði að í viðlagi sé stærsti kór á Íslandi en auk Salaskólanemenda eru fjölmargir aðrir sem koma að söngnum. Upptakan fór fram í íþróttahúsinu í vikunni og hægt er að hlusta á upptökuna hér.

Í dag, 11. maí, fékk Salaskóli grænfánann afhentan í fjórða sinn. Það var gert við hátíðlega athöfn inni í skólanum en upphaflega átti hún að fara fram utandyra en rigningin setti strik í reikninginn. Ármann bæjarstjóri kom í heimsókn og ávarpaði krakkana, fulltrúi Landverndar tók síðan við og afhenti grænfánann sem grænfánanefnd skólans tók við en í þeirri nefnd eru 16 nemendur skólans. Við afhendinguna var útskýrt fyrir hvað myndirnar á fánanum stæðu. Lagið var tekið, Salaskólasöngurinn hljómaði vel og nokkur velvalin vorlög voru sungin. Vissulega góður endir á opna deginum í Salaskóla. Myndir.

Vinabekkirnir Maríuerlur, 4. bekkur, og  Súlur, 7. bekkur,  fóru saman í Rjúpnalund í fyrradag.   Varðeldur var tendraður og sykurpúðar hitaðir.  Vígð voru þrjú poppsköft en krakkarnir voru of áköf til að byrja með því ekki var kominn nógu mikill hiti til að poppa.   En í lokatilrauninni small út það besta popp sem viðstaddir höfðu smakkað.   Allir voru glaðir og ánægðir og sumir fóru í góða göngu efst upp í hæðina í lokin.