Það er orðin hefð í Salaskóla að halda upp á Lúsíumessu sem tengist verndardýrðlingnum Santa Lúsíu. Þá klæðast stúlkur í yngri bekkjum hvítum kyrtlum, hnýta silfur- og gullbönd um höfuð og hafa ljós í hönd. Lúsían sjálf, er prýdd ljósakransi og með rauðan linda um mitti. Harpa Þöll Eiríksdóttir í kjóum var Lúsía þetta árið. Falleg og hátíðleg stund.
Stórskemmtilegur viðburður átti sér stað í dag þegar nemendur í 6. bekk buðu yngri nemendum skólans að koma og horfa á jólaleikrit súlna og langvía. Leikritið var frumsamið af þeim en byggðist að hlut til á jólasveinavísum Jóhannesar úr Kötlum.
Myndir frá sýningunni eru hér.
Sjöttubekkingarnir sáu alfarið um allt sem tengdist leiksýningunni og fyrir utan leikara og upplesara var valinn maður í hverju verki s.s búningagerð, förðun, leikmynd, leikskrá, hljóð- og ljósastjórn og sviðsaðstoð. Krakkarnir skiluðu öllum hlutverkum með miklum sóma og áhorfendur skemmtu sér afskaplega vel.
Árleg aðventuganga foreldrafélags Salaskóla verður fimmtudaginn 11 des. kl 17:30. Gangan er öllum opin og hvetjum við alla íbúa hverfisins til að ganga með.
Gengið er frá Salaskóla kl 17.30, gengið verður m.a að nýrri kirkju hverfisins þar sem Sr. Guðmundur Karl Brynjarsson flytur jólahugvekju. Að göngu lokinni verðu boðið uppá heitt kakó og smákökur í Salaskóla við undirleik Skólahljómsveitar Kópavogs.
Foreldrafélag Salaskóla
Hinu árlega bekkjamóti Salaskóla lauk föstudaginn 5. desember. Til úrslita kepptu 14 bestu liðin: Fjögur bestu úr yngsta flokki, 1. til 4. bekk, fimm bestu úr miðstigi 5 til 7 bekk og fimm bestu úr unglingadeild.
Leikar fóru þannig að A lið Lóma bar sigur úr bítum með 15 vinninga en A-lið Fálka fylgdi fast á eftir með 13 vinninga. Tvö lið, A lið hjá Kjóum og Örnum, voru jöfn að vinningum með 11 vinninga sem endaði þó með því að Kjóarnir tóku 3. sætið vegna sterkari stöðu.
Við óskum liðunum til hamingju með frábæran árangur. Meðfylgjandi mynd sýnir sigurvegarana, A lið Lóma, ásamt Tómasi. Nánari úrslit með því að smella á Lesa meira.
| Hér birtist listi yfir 10 bestu liðin | |||||||
| Úrslit | Lið | vinn | 1b | 2b | 3b | 1v | 2v |
| 1 | Lómar A lið | 15 | Páll Andrason | Eiríkur Örn | Andri Hrafn | Sigurbjörn | |
| 2 | Fálkar A | 13 | Patrekur | Jóhanna | magnús | ||
| 3 | Kjóar A | 11 | Birkir Karl | Sindri | Arnar | Jónas | |
| 4 | Ernir A | 11 | Ragnar | Bjarki | Steinar | Agnar | |
| 5 til 6 | Himbrimar A | 10 | ómar | Halldór | Guðjón | Hinrik | |
| 5 til 6 | Svölur A | 10 | Guðmundur | Steindór | Guðjón | Páll | |
| 7 til 8 | Langvíur A | 9 | Baldur Búi | Selma Líf | Birkir Þór | ||
| 7 til 8 | Ritur A | 9 | Hildur Berglind | Kári Steinn | Garðar Elí | ||
| 9 til 10 | Langvíur B | 8,5 | Aron | Eyþór | Ragnheiður | ||
| 9 til 10 | Krummar A | 8,5 | Þormar | Björn | Orri | Breki | Krissi |
Útikennslan er í góðum gír í rökkri vetrarmorgunsins. Riturnar hittust í þinginu snemma morguns með kennurum sínum þar sem voru kertaljós og tendrað var lítið bál. Allir voru með jólasveinahúfur, ennisljós eða vasaljós. Kvæðið um jólasveinana eftir Jóhannes úr Kötlum var lesið og nemendur komu fram og fengu leikmuni eftir því sem við á. Í dag var sérstök stemning þar sem komu smá snjókorn meðan stóð á þingstörfum og settu ævintýraljóma á leiksviðið. Í lokin gengur riturnar inn í stofuna sína í jólasveinaröð og fengu heitt kakó með nestinu sínu.
Góðir gestir komu snemma miðvikudags og skemmtu nemendum. Það voru þær stöllur Hildur og Þórdís Heiða, sem er að vísu kennari við skólann, er buðu nemendum í 1.-4. bekk að koma á sal og vera þáttakendur í stórri hljómsveit sem stofnað var til á staðnum. Þessi heimsókn er liður í verkefninu Tónlist fyrir alla sem grunnskólum er boðið upp á. Reglulega eru grunnskólar heimsóttir af tónlistarmönnum sem flytja skemmtileg verk, þessar uppákomur hafa verið afar fjölbreyttar og mikil ánægja verið með þær.
Móðurmálsviku lauk með því að nemendur í 9. og 10. bekk var boðið að sjá leikritið Skugga – Svein með kennurum sínum. Leikritið var sýnt í nýju leikhúsi í Kópavogi sem staðsett er við Funalind og ber heitið Leikhúsið.
Leikfélag Kópavogs setti sýninguna upp og voru nemendur og kennarar almennt mjög ánægðir með leikhúsferðina. Myndin var tekin á meðan beðið var eftir rútunni sem fluttu þau á áfangastað.
Nú hafa foreldra allra nemenda átt kost á að koma í morgunkaffi hér í Salaskóla á þessu skólaári. Haldnir voru 20 fundir og mættu 413 foreldrar, eða 75% foreldra.
Í unglingadeild mættu að meðaltali 55% foreldra, á miðstigi mættu að meðaltali 78% foreldra og á yngsta stigi 84% foreldra. Í þeim bekk sem best mæting var mættu foreldrar allra barna en í þeim bekk sem slökust var mæting komu 36% foreldra. Besta mætingin var í lóum, þar var 100% mæting. Steindeplar lentu í 2. sæti með 95% mætingu og mávar í 3. sæti með 90% mætingu.
Við erum að vinna úr matsblöðunum sem foreldrar fylltu út á fundunum. Ljóst er að foreldrar eru mjög ánægðir með skólastarfið og bera mikið traust til kennara. Jafnframt komu fram ágætar ábendingar um það sem betur má fara og eitthvað af tillögum um nýjar leiðir. Skýrslan verður birt á heimasíðunni þegar hún er tilbúin.
Morgunkaffið í Salaskóla hefur öðlast sess í samstarfi skólans við foreldra. Það skilar miklu inn í skólastarfið, byggir upp traust á milli skólans og heimilanna og hjálpar okkur við að byggja upp góðan skóla.
Í dag komu slökkviliðsmenn í heimsókn í skólann og voru með eldvarnarfræðslu hjá nemendum í 3. bekk. Nemendur fengu að skoða bæði sjúkra- og slökkvibíla sem var lagt fyrir utan skólann. Krakkarnir höfðu gaman að heimsókninni og fannst mikið til þess koma að fá að stíga upp í sjúkrabíl og komast í návígi við slökkviliðsbíl. 
Í þessari viku hefur markvisst verið unnið með móðurmálið á öllum stigum í svokallaðri móðurmálsviku. Ljóð hafa verið kyrjuð, upplestur æfður og mikil ritun í gangi svo eitthvað sé nefnt. Margir bekkir fóru á sal til að syngja ýmsar vísur og ljóð með aðstoð tónmenntakennara og ungra hljóðfæraleikara sem allt voru nemendur í skólanum. Nemendur tróðu einnig upp á sal með eigin leikþætti og frumsamin ljóð sem bar vott um frjótt ímyndunarafl þeirra.