Starfsáætlun Salaskóla fyrir skólaárið er komin á heimasíðu Salaskóla. Hún eru undir skólanámskrá / starfsáætlun. Biðjum nemendur, foreldrar og starfsfólk að kynna sér áætlunina vel.
Category Archives: Fréttir
Myndir frá Norræna skólahlaupinu
Smellið á tengilinn og þá getið þið séð fullt af myndum frá Norræna skólahlaupinu í Salaskóla
Skólasetning 22. ágúst
Salaskóli verður settur mánudaginn 22. ágúst nk. Nemendur mæta sem hér segir:
5., og 6. kl. 8:30
(Foreldrar nemenda í 5. og 6. bekk eiga að mæta á sama tíma og fara á fund vegna þess að börn þeirra fá afhentan ipad. Mjög mikilvægt að amk. annað foreldri mæti).
2., 3. og 4. bekkur kl. 9:30
7., 8., 9. og 10. bekkur kl. 10:30
Nemendur sem eru að fara í 1. bekk verða sérstaklega boðaðir með foreldrum sínum dagana 22. og 23. ágúst. Kennsla skv. stundaskrá hefst í 1. bekk miðvikudaginn 24. ágúst. Kennsla í 2. – 10. bekk hefst samkvæmt stundaskrá þriðjudaginn 23. ágúst.
Dægradvöl opnar þriðjudaginn 23. ágúst kl. 13:30.
Nýir nemendur (aðrir en 1. bekkingar) eru boðnir í skólann fimmtudaginn 18. ágúst kl. 12:30. Þá fá þeir smá kynningu á skólanum og starfinu.
Forgangsröðun vegna manneklu í dægradvöl
Það gengur illa að manna dægradvölina og nú þegar tæp vika er í skólasetningu eru aðeins fimm starfsmenn þar. Okkur vantar sjö til átta starfsmenn til viðbótar til þess að geta tekið við þeim fjölda barna sem óskað hefur verið eftir vistun fyrir. Það eru lítil sem engin viðbrögð við auglýsingum okkar en þó eigum við von á tveimur starfsmönnum á næstu dögum. Á liðnum árum höfum við stundum verið í svipaðri aðstöðu og þá rætist oft úr þegar háskólar og framhaldsskólar byrja.
Við vonum að það verði svo nú og jafnframt biðjum við ykkur, foreldrar góðir, að vekja athygli þeirra, sem e.t.v. eru að leita sér að hlutastarfi, á að hér er skemmtilega vinnu að fá. Það er líka möguleiki á fullu starfi ef svo ber undir.
Það er deginum ljósara að dægradvölin verður ekki starfhæf nema að hluta þriðjudaginn 23. ágúst þegar skólastarf hefst að fullu. Við verðum því að takmarka þann fjölda sem þangað kemur þar til meiri mannskapur fæst. Ákveðið hefur verið að forgangsraða þannig að nemendur í 1. bekk ganga fyrir og eldri nemendur verða svo teknir inn eftir því sem fjölgar í starfsmannahópnum.
Þetta er auðvitað afleitt ástand en við getum ekki veitt þá þjónustu sem til er ætlast nema hafa nægan mannskap. Við vonum að þið sýnið þessu skilning og að málin leysist hratt og vel. Við látum ykkur fylgjast með.
Smá breyting á skóladagatali
Það höfðu slæðst inn tvær villur í skóladagatal komandi skólaárs sem nú hafa verið leiðréttar. Annars vegar var settur skipulagsdagur 14. nóvember en hann á að vera 21. nóvember. Svo hafði staðið að það væri skipulagsdagur 14. febrúar en það var bara vitleysa. Rétt skóladagatal er hér á heimasíðu Salaskóla.
Vantar starfsfólk
Salaskóli auglýsir eftir starfsfólki í dægradvöl og starfsmanni í mötuneyti.
Í dægradvöl vantar 5 – 6 starfsmenn. Þar er um að ræða 50% starf eftir hádegi.
Í mötuneyti vantar einn starfsmann í 100% starf. Starfið felst í að undirbúa morgunhressingu og hádegisverð fyrir nemendur og starfsfólk, aðstoð við síðdegishressingu í dægradvöl og frágang í eldhúsi.
Við erum að leita að duglegu og stundvísum einstaklingum sem eru reiðubúnir að starfa í anda stefnu skólans.
Upplýsingar um starfið fást hjá skólastjórnendum í síma 441 3200. Sækja þarf um starfið á vef Kópavogsbæjar
Nýir nemendur?
Við erum nú á fullu að undirbúa næsta skólaár og það er mikilvægt að fá sem gleggstar upplýsingar um fjölda nemenda í vetur. Við þurfum að fá upplýsingar um nýja nemendur sem ekki er enn búið að skrá inn. Við biðjum því alla sem eiga eftir að skrá nemendur að ganga frá því strax. Biðjum fólk líka að hnippa í nýflutta nágranna og vekja athygli á þessu.
Innkaupalistar Salaskóla?
Innkaupalistar grunnskólanna ber gjarnan á góma milli skólaslita og skólasetningar. Það grípur jafnvel um sig eitthvert innkaupalistaæði sem er tiltölulega nýtt fyrirbæri. Foreldrar pressa á skólana og skömmu eftir skólaslit berast okkur fyrirspurnir um hvort listarnir séu ekki að koma á netið og svo þegar líður á sumarið fara verslanirnar að auglýsa. Foreldrar fara í búðir með listana og kaupa það sem á þeim stendur. Þessu fylgja veruleg útgjöld, 10 þús. kr. fyrir hvern lista og þeir sem eiga fleiri en eitt barn þurfa að leggja fram tugi þúsunda. Það er til viðbótar öðru sem þarf fyrir skólabyrjun eins og ný föt, skólatösku o.s.frv.
En þarf þetta? Þurfa öll börn að mæta fyrsta skóladaginn með allar stílabækurnar sem gert er ráð fyrir að þurfi að nota næstu 9 mánuðina? Þarf að kaupa alla blýanda fyrir veturinn í ágúst? Nei það þarf ekki.
Það er eðlilegt að foreldrar og nemendur fari yfir það sem til er frá fyrra skólaári. Stílabækur sem ekki eru fullnýttar eru fullgildar, sem og blýantar sem ekki eru enn orðnir stubbar. Strokleður og yddarar virka yfirleitt fleiri en eitt skólaár og trélitirnir frá því í vor eru e.t.v. bara í lagi enn þá. Er ekki bara skynsamlegt að byrja nýtt skólaár á að nota þetta og kaupa svo inn í það sem gengur úr sér eftir því sem líður á veturinn? Foreldrar og nemendur þurfa að passa upp á að endurnýja þessa hluti eftir þörfum allan veturinn.
Salaskóli mun í haust ekki leggja fram innkaupalista en aftur á móti fá nemendur í hendur gátlista yfir það sem eðlilegt er að nemandi sé með í töskunni. Eðlilegt er að foreldrar og nemendur fari reglulega yfir gátlistann og verði sér þá út um það sem vantar hverju sinni.
Í 1. – 4. bekk stendur skólinn fyrir sameiginlegum innkaupum á ritföngum sem nemendur í hverjum námshópi hafa aðgang að allan veturinn. Foreldrar hafa greitt fyrir þetta og hefur kostnaður verið einhversstaðar á milli 2 – 3 þús. kr. Í 5. – 10. bekk verða svo allir nemendur með spjaldtölvur og því hlýtur þörf að ýmis konar stílabókum, reiknivélum og slíku að hverfa.
Tökum höndum saman og gerum þetta af skynsemi.
Skólaslit miðvikudaginn 8. júní
Útskrift 10. bekkinga verður mánudagskvöldið 6. júní og hefst kl. 20:00
Skólanum verður svo slitið miðvikudaginn 8. júní og eiga nemendur að mæta sem hér segir:
9:30 Hrossagaukar, spóar, starar, maríuerlur, sandlóur, sólskríkjur, kríur, ritur, vepjur, smyrlar, súlur og krummar.
10:00 Lóur, sendlingar, stelkar, steindeplar, glókollar, músarrindlar, langvíur, tildrur, tjaldar, kjóar, svölur, fálkar.
Nemendur mæta í anddyri þar sem verður smá viðhöfn. Að henni lokinni fara þeir með kennurum sínum í kennslustofurnar.