Seinni dagur fjölgreindaleikanna var í dag. Krakkarnir kepptust við að leysa hinar ýmsu þrautir sem fyrir þá voru lagðar og gaman var að sjá hversu samvinnan var góð. Þegar krakkarnir voru spurðir hver væri skemmtilegasta stöðin á leikunum fannst þeim erfitt að komast að ákveðinni niðurstöðu. Sumir byrjuðu kannski á að segja dansinn, en bættu þá við að smíðin væri líka skemmtileg, og… bandýið og … fuglastöðin og ..kapplakubbarnir – og þannig var haldið áfram að telja upp. Sumir höfðu þó vaðið fyrir neðan sig og svöruðu að ALLT á fjölgreindaleikunum væri skemmtilegt. Einfalt og gott svar. Það er mál manna að aldrei hafi tekist eins vel til með leikana og núna. Krakkarnir voru einstaklega duglegir og vinnusamir, hópmeðlimir unnu mjög vel saman, vel gekk að fara á milli stöðva og fyrirliðarnir voru til fyrirmyndar.

Það er greinilegt að þrautalausnir krefjast orku því krakkarnir tóku vel til matar síns í hádeginu og gerðu pylsunum góð skil. Síðan var boðið upp á ís í eftirrétt til hátíðabrigða. Bros lék um varir nemenda þegar þau skunduðu heim úr skólanum í dag. Á morgun, föstudaginn 4. okt., er samstarfsdagur kennara í Kópavogi og því frí í skólanum. Krakkarnir eiga að mæta aftur í skólann á mánudaginn skv. stundaskrá.

Lesið meira um fjölgreindaleikana.         

Myndir frá seinni degi fjölgreindaleika.

Þegar farið var að grennslast nánar fyrir um þessi furðudýr og skrítnu mannverur (sjá frétt hér á undan) kom í ljós að í dag er fyrri dagur fjölgreindaleika Salaskóla. Þá er öllum krökkum í skólanum skipt niður í hópa, u.þ.b. 12 krakkar í hóp, eldri sem yngri saman í hóp ásamt tveimur fyrirliðum er eiga að sjá um að allt fari vel fram. Hópurinn fer á milli 40 stöðva þar sem reynir á mismunandi hæfni hópmeðlima og hver og einn í hópnum leggur sitt af mörkum allt eftir hæfileikum sínum og getu. Sem dæmi má nefna að sumir eru betri en aðrir í að greina bragð, að þekkja fána, saga út, sparka stígvéli og hitta bolta í körfu. Þau yngri eru oft betri en þau eldri í einhverju – og öfugt. Á hverri stöð er stöðvarstjóri sem útskýrir í hverju verkefnið felst. Stöðvarstjórinn er ávallt kennari/starfsmaður sem er klæddur í grímubúning eða furðuföt. Þá er málið upplýst sem betur fer og kennararnir voru á sínum stað í morgun en voru bara óþekkjanlegir.

Fjölgreindaleikarnir, í öllu sínu veldi, eru sem sagt haldnir í Salaskóla í dag í 11. skipti, nemendum og starfsfólki til mikillar ánægju. Þar er eitt af aðalmarkmiðunum að hver og einn nemandi fái að njóta sín á sínum eigin forsendum. Leikarnir gengu afar vel í dag og við hlökkum til seinni hluta leikanna á morgun.

Sjá myndir frá morgninum og af skrítnum stöðvarstjórum.

Á fjölgreindaleikum í síðustu viku var á einni stöðinni boðið upp á vöfflur eftir að liðið hafði leyst úr ákveðinni þraut. Krakkarnir voru afar ánægðir með þetta framtak stöðvarstjórans og vöfflurnar runnu ljúflega niður. Sumir komu svo að máli við stöðvarstjórann, hana Fríðu, og báðu um uppskrift að vöfflunum góðu. Að sjálfsögðu varð Fríða við þeirri bón og hér kemur uppskriftin. Uppskriftina er einnig að finna inni á Heimilisfræðihorninu á salaskoli.is/ Námið (Uppskriftir fyrir 5. – 10. bekk).

Kósý-herbergi? Hvað er nú það, spurði einhver á fjölgreindaleikunum í gær?  Þegar farið var á stúfana til að njósna fundust loksins dyr sem merktar voru Kósý-herbergi  STÖР11. Inni ríkti verulega notaleg stemning þar sem liðsmenn eins liðsins voru að sýsla, sumir voru í tölvuspili, aðrir að horfa á vídeó og loks voru nokkrir að spila billjard.  Allir mjög slakir og nutu þess að vera í algjörum rólegheitum. Þetta var þá AFSLÖPPUNARSTÖРinn á milli til þess að safna kröftum fyrir þau viðfangsefni sem framundan voru á fjölgreindaleikum. Kósí hjá þeim!

Liðsmenn í liði númer 38 komu fagnandi út úr einni stöðinni á efri hæð í gula húsi og hrópuðu: „Við slógum metið“. Við nánari eftirgrennslan kom í ljós að þrautin á þessari stöð fólst í því að þekkja eins marga fána og mögulegt var á 10 mínútum.

Greinilegt var að nokkrir í þessu liði voru mjög vel að sér í fánum hinna ýmissa landa því þeir náðu að þekkja 114 fána sem stöðvarstjórinn, Alla bakarameistari, sagði að væri met frá upphafi. Skyldi einhverju liði takast að slá þetta met áður en kemur að lokum fjölgreindaleika í dag. Spennandi!