Dægradvöl fyrir 4. bekk næsta skólaár

Við höfum haft áhyggjur af því hversu lítið dægradvölin er nýtt fyrir 4. bekkinga. Við tökum umræðu um þetta í morgunkaffinu í janúar og þar kom fram að forledrar deila þessum áhyggjum með okkur. Við lögðumst því yfir þetta og erum komin með drög að spennandi verkefnum fyrir 4. bekkinga í dægradvöl næsta skólaár. Við munum kynna það betur þegar liður á vorið.

Skólalóðin bætt svolítið í sumar

Í sumar verða svolitlar framkvæmdir á skólalóðinni. Boltasvæðið á malbikinu verður afmarkað, fimmhyrningsróla verður sett upp, setpallar settir hér og þar svo krakkarir geti tyllt sér, gúmmíhellur verða settar þar sem bæta þarf öryggi og svæði á lóðinni verða afmörkuð með girðingum. Þetta eru framkvæmdir upp á 5 milljónir og bætir sannarlega skólalóðina. Frekari framkvæmdir verða svo vonandi á næstu misserum.

Vetrarleyfi á næsta skólaári

Það er búið að ákveða vetrarleyfisdaga næsta skólaár. Þeir eru 17. og 20. október og 23. og 24. mars. Skipulagsdagar á haustönn verða 10. október og 17. nóvember. 

oskudagur

Öskudagsgleði í Salaskóla

oskudagur
Í tilefni öskudagsins mættu nemendur í grímubúningum í skólann í morgun. Á göngum skólans mátti  sjá gangandi legókubb, drauga, svífandi sjónvarp, ófrýnilegar nornir, stælgæja svo eitthvað sé nefnt. Allt setti þetta mikinn svip á skólann okkar í dag. Margt var í gangi og fóru skrautlegir nemendurnir á milli stöðva til að leysa hinar ýmsu þrautir og verkefni.

Nemendur á yngsta stigi og miðstigi gátu t.d. spilað, unnið í ipödum, teiknað, byggt legófarartæki, útbúið kókoskúlur, dansað og tekið þátt í ratleik. Unglingarnir okkar í 8. og 9. bekk fóru í bæjarferð á leiksýningu en tíundubekkingar aðstoðuðu yngri nemendur við andlitsmálun og fleira í þeim dúr. Öskudagsgleðinni lauk síðan með pylsuveislu í hádeginu og allir nemendur fengu nammipoka í boði foreldrafélagsins eftir matinn. Hér má sjá myndir af skrautlegum nemendum.   

innritun

Innritun í Salaskóla fyrir skólaárið 2014-2015

innritun
Inn­ritun 6 ára barna (fædd 2008) fer fram í Salaskóla mánudaginn 3. og þriðjudaginn 4. mars.
Sömu daga fer fram inn­ritun nemenda sem flytjast milli skóla­hverfa og þeirra sem flytja í Kópa­vog eða koma úr einka­skólum. Haustið 2014 munu skólinn hefjast með skólasetningardegi föstudaginn 22. ágúst. Nánari upplýsingar eru á heimasíðum skólans er nær dregur.

Sérstök athygli er vakin á því að um­sóknar­frestur um heimild til að stunda nám í einka­skólum eða grunn­skólum annarra sveit­ar­f­é­l­aga er til 1. apríl og skulu umsóknir berast grunnskóladeild menntasviðs rafrænt á eyðublaði í íbúagátt sem er á heimasíðunni www.kopavogur.is. Sækja þarf um að nýju fyrir nemendur, sem nú eru í slíkum skólum, ef gert er ráð fyrir að þeir verði þar næsta vetur.

download

Úrslitin úr meistaramótinu 2014

download
Meistaramóti Salaskóla er lokið  en úrslitin réðust föstudaginn 14. febrúar þegar allir þeir sterkustu úr hverjum árgangi hittust í keppninni um meistara meistaranna. 
Keppendur kepptu í þremur undanrásum og að auki kepptu 22 í svokallaðri Peðaskák. Heildarfjöldi þátttakenda var 193 nemendur sem eru ca. 37% af nemendum Salaskóla. 
Sigurvegari mótsins varð Hildur Berglind Jóhannsdóttir. 
Meistari unglinga varð einnig  Hildur Berglind Jóhannsdóttir. 
Meistari miðstigs varð Jason Andri Gíslason.
Meistari yngsta stigs varð Kári Vilberg Atlason.
Mótsstjóri var Tómas Rasmus.

Smellið hér til að sjá heildarúrslit. 

Skoðið myndir frá verðlaunafhendingu.

100hatid

Hundraðdagahátíðin í 1.bekk

100hatid
Í dag eru fyrstubekkingarnir okkar búnir að vera 100 daga í skólanum og af því tilefni var haldið upp á daginn með hundraðdagahátíð. Þá er nú margt gert sér til skemmtunar og mikið um að vera. Nú rétt fyrir hádegi í dag var búið að koma fyrir skálum með góðgæti á eitt borðið og það var verkefni hvers og eins að telja alls hundrað mola úr skálunum. Krakkarnir voru mjög einbeittir við þetta verkefni og létu ekkert trufla sig enda nákvæmisverk að telja nákvæmlega 100 stykki. Ýmiss önnur verkefni voru í gangi t.d. bjuggu allir sér til hundraðdagakórónu. Eftir pylsuveislu í hádeginu var svo sleginn botninn í veisluna með því að horfa á kvikmynd saman og borða nammið úr pokanum sínum. Skemmtileg hefð í Salaskóla sem hefur viðgengist nokkuð lengi. Myndir.

owl

Foreldradagur 28. janúar

owl
Á morgun, þríðjudaginn 28. janúar, er foreldradagur hér í Salaskóla þá koma nemendur með foreldrum sínum í skólann til að hitta umsjónarkennarann sinn og fá vitnisburð fyrir þá önn sem nú er liðin. Farið er yfir stöðu nemenda í náminu og horft til næstu annar. Í slíku viðtali setja nemendur sér gjarnan markmið fyrir námið fram að vori í samráði við kennarann og foreldra sína. Sú nýjung var tekin upp nú að foreldrar gátu pantað sér viðtalstíma á Mentor hjá umsjónarkennara barna sinna. Virðist sú tilhögun hafa mælst vel fyrir hjá foreldrum.

PC180013

Litlu-jólin og jólafrí

PC180013
Í dag flykktust prúðbúnir nemendur í 1. – 7. bekk á Litlu jólin í Salaskóla. Í Klettagjá var fallega skreytt jólatré sem krakkarnir dönsuðu í kringum við undirleik hljómsveitarinnar Jólakúlnanna en meðlimir hennar voru að þessu sinni bæði nemendur og kennarar skólans. Allt í einu heyrðust háreysti mikil og inn um einn gluggann hentist rauðklæddur maður með miklum bægslagangi. Jú, jú… það var þá sjálfur jólasveinninn sem var kominn til þess að heilsa upp á krakkana. Hann sagðist heita Grýlukertasleikir sem viðstaddir minntust ekki að hafa heyrt um áður enda ekki skrýtið því Grýlukertasleikir kemur bara á 500 ára fresti til byggða til að gefa skrýtnar gjafir eins og jóli útskýrði fyrir krökkunum. Hafsteinn skólastjóri fékk til dæmis silfurskó sem voru allt of litlir og Magga sérkennari var svo heppin að fá eitthvað sem líktist uppblásinni jólagrís. Jólasveinninn lék á létta strengi og sagði að það væru bara þægir krakkar í skólanum en það sama væri ekki hægt að segja um kennara. Hvað sem hann meinti með því.

Eftir Litlu-jólin byrjar langþráð jólafrí nemenda og starfsfólks Salaskóla. Á nýju ári mæta kennarar á samstarfsdag þann 3. janúar en skóli hjá nemendum hefst ekki fyrr en mánudaginn 6. janúar skv. stundaskrá.

Starfsfólk skólans óskar nemendum og fjölskyldum þeirra gleðilegra jóla og farsæls nýárs með þakklæti fyrir gott samstarf á árinu 2013.