Á aðventunni er gjarnan bryddað upp á einhverju sem er öðruvísi og brýtur upp hefðbundið skólastarf. Í dag var einmitt notalegur spilatími hjá yngri bekkjunum og í lagi að koma með spil að heiman til að leyfa bekkjafélögunum að prófa. Út um allt sáust litlir hópar sem krúnkuðu sig saman yfir spilin sín og höfðu gaman að. Mælst var til þess að sem flestir klæddust einhverju grænu í dag en það var þó engin skylda. Hér eru myndir frá spiladegi í 2. bekk.

Í rökkrinu er svo gott að kveikja á kertum, halla sér aftur í sætinu, lygna augunum aftur og hlusta á góða sögu eða sögubút. Það gerðu einmitt krakkarnir í 1. – 5. bekk í morgun þegar Gerður Kristný, rithöfundur, kom í heimsókn og las upp úr bókunum sínum fyrir þau. Gerður kom víða við, hún sagði þeim frá æsku sinni, spáði í ævintýrin, fræddi þau um bækurnar sína og las upp úr þeim einni af annarri. Hún endaði á þeirri síðustu sem ber heitið Forsetinn, prinsessan og höllin sem svaf. Gerður brá upp teikningum úr bókunum sínum á meðan hún las sem voru býsna líflegar. Heimsóknir sem þesssar eru afar kærkomnar og brjóta upp dagana hjá nemendum sem kennurum.   

 … og orða stórt og smátt sem er og var.. hljómaði úr sal skólans í bítið, á degi íslenkrar tungu. Þar fór fram opinn samsöngur nemenda í 1. og 2. bekk og foreldrar og aðstandendur voru mættir til hlusta á krakkana sína. Krakkarnir voru afar hressir og sungu við raust og reyndu að fá foreldra til að taka undir í sögnum sem gekk þó misjafnlega. Skólasöngur Salaskóla var fluttur þarna í fyrsta skipti opinberlega  en hann er að finna annars staðar á síðunni. Hressileg byrjun á góðum degi.

Já, hvernig verða ljóð til? Hvar liggja landamæri ljóðsins? Liggja þau einhvers staðar? Þessar spurningar komu upp í kollinn á okkur, nemendum í 8.-10. bekk og kennurum, við að hlusta á skáldin Anton Helga Jónsson og Kristínu Svövu Tómasdóttur flytja ljóðin sín. En þau gerðu sér ferð í Salaskóla í morgun til þess að kynna okkur fyrir ljóðlistinni. Krakkarnir tóku sannarlega vel á móti þeim, hlustuðu af athygli og sumir voru forviða yfir hversu skemmtileg ljóð gætu verið. Skáldunum er þakkað þetta skemmtilega innlit til okkar hér í Salaskóla. Nemendum verður vafalítið heimsóknin minnisstæð á væntanlegum móðurmálsdögum sem eru að ganga í garð.

Föstudaginn 28.10. fór glæsilegur hópur héðan úr Salaskóla, 6. bekkur Teistur, og spilaði lokaatriðið á hátíðardagskrá í Norðurljósasal Hörpunnar. Tilefnið var 60 ára afmælishátíð Tónmenntakennarafélags Íslands og þar spilaði okkar fólk tónverk sem þau höfðu nýlega samið og flutt fyrir foreldra sína og nemendur í Salaskóla. Verkefninu var stýrt af þeim Þórdísi Heiðu sem er okkur kunnug hér í Salaskóla og samstarfskonu hennar Hildi Guðnýju Þórhallsdóttur. Teisturnar spiluðu á margvísleg hljóðfæri og stóðu sig með mikilli prýði þar sem þau spiluðu af innlifun fyrir troðfullan sal, yfir 500 manns voru að hlusta. Fleiri myndir.

Efnt var  til samkeppni á dögunum þar sem óskað var eftir tillögum að nafni á útikennslustofuna sem Salaskóli og nærligggjandi leikskólar eiga saman. Fullt af góðum tillögum bárust og sammæltust leikskólarnir og Salaskóli um nafnið Rjúpnalundur sem er hugmynd sem kom frá Skúla E. Kristjánssyni, nemanda í fálkum hér í Salaskóla.   

Góðir gestir komu í skólann í dag til að heimsækja sérstaklega  nemendur í 6. og 7. bekk. Þau Valgeir Guðjónsson tónlistarmaður og Steinunn Jóhannesdóttir rithöfundur kynntu skáldið Jóhannes frá Kötlum með tali og tónum. Nemendur hlustuðu með athygli, hrifust með söngnum og voru áreiðanlega  margs vísari á eftir.  Ávallt er gaman að fá ljúfa heimsókn sem þessa og brjóta upp hversdagsleikann og er þeim Valgeiri og Steinunni færðar þakkir fyrir. Einhverjir nemendanna munu síðan halda áfram að fjalla um kveðskap Jóhannesar frá Kötlum í skólanum.