Tvær litlar snótir í 1. bekk fengu það verkefni að reikna nokkur dæmi sem sett voru upp í spjaldtölvu (ipad). Dæmin voru misþung og sum reyndu meira á en önnur. Puttarnir voru á lofti en stundum vantaði fleiri putta til að klára dæmin. Hvað var til ráða? Þær gripu pinnabretti á næstu hillu, en eins og menn vita hefur það verið notað í stærðfræðinámi áratugum saman. Önnur þeirra taldi saman pinnana á brettinu  og hin var með spjaldtölvuna og saman fundu þær svarið sem var síðan skráð til þess að komast í næsta dæmi. Á endanum fengu þær rósir og verðlaunapening í spjaldtölvunni fyrir vel leyst verkefni.  Ekki dóu þær ráðalausar, þessar litlu duglegu hnátur.

Áhuginn og einbeitnin skein út úr andlitum fyrstubekkinganna okkar, glókollanna, er þeir fengu í hendurnar spjaldtölvur (ipada) í síðustu tveimur kennslustundunum í gær. Tveir og tveir unnu saman og þeir gátu valið um nokkur verkefni í spjaldtölvunni t.d. að búa til lítið tónverk, „sulla“ í litríku vatni, búa til listaverk og raða saman pinnum eftir fyrirmynd. Allir kepptust við að vinna í verkefnunum sínum og samvinnan hefur sjaldan verið betri. Þetta er hluti af þróunarverkefni sem Salaskóli tekur þátt í á þessu skólaári en markmið þess er m.a. að auk aðgengi allra nemenda skólans að upplýsingatækni og þróa notkun spjaldtölva í öllu námi þeirra. Bæði kennarar og nemendur sýna verkefninu mikinn áhuga og margt er á döfinni í þessum efnum. Sjá myndir frá ipad-stund hjá glókollum og sólskríkjum.





Í dag, 19. desember, er spilað um  svokallaðan Óttarsbikar sem er árlegur viðburðum um þetta leyti árs haldinn í minningu Óttars heitins húsvarðar. Skipuð eru lið úr öllum bekkjum á unglingastigi  ásamt liði kennara og blásið til mikils körfuboltamóts í íþróttahúsinu. Mikil steming var í upphafi móts og ljóst að stefndi í mikið fjör og keppnisandinn var alveg í réttum gír, hjá yngri sem eldri. Í áhorfendastúkunni sást til nokkurra kennara sem létu illum látum er þeirra lið skoraði – og nemendur voru líka góðir að hvetja sín lið áfram. Jafnt var á komið með liðunum og ekki mátti sjá í upphafi hvaða lið myndi fara með sigur af hólmi. En eftir gífurlega mikla baráttu og æsispennandi úrslitaleik voru það tíndubekkingar sem báru sigur úr bítum og hlutu Óttarsbikarinn en níundubekkingar urðu í öðru sæti. Verðlaunafhending fer fram í kvöld á jólaskemmtun unglingastigs.  

Í gær hittust tveir bekkir til að spjalla saman.  Var þetta mjög merkilegur spjallfundur en annar bekkurinn voru Mávar á Íslandi og hinn bekkurinn voru jafnaldrar á Kýpur.  Bekkirnir hittust í gegnum Skype samskiptaforritið, töluðu ensku og skemmtu sér vel.   Fundurinn stóð í um 15 mínútur.  Þessi fundur var hluti af comeniusarverkefninu sem við erum þátttakendur í. En Guðbjörg umsjónarkennari í Mávum og Hulda deildarstjóri eru nýkomnar af sameiginlegum kennarafundi sem haldinn var í Þýskalandi.   Á þeim fundi voru næstu skref ákveðin en á vormánuðum verðum við með litla Ólympíuleika.   Bekkirnir á miðstigi eru þessa dagana að senda jafnöldrum sínum í hinum þátttökulöndunum jólakort.  Hægt verður að fylgjast með verkefninu á heimasíðu skólans undir merki menntastefnu Evrópusambandsins sem styrkir þetta verkefni. 

Það var mikil stemning hjá krökkunum í dægradvölinni í gær þegar þau fengu að skreyta piparkökur í öllum regnbogans litum. Einbeitnin skein úr andlitunum og greinilegt að þeim þótti gaman að kökuskreytingalistinni. Skreyttu kökurnar voru síðan settar í box sem krakkarnir fengu að taka með sér heim. Nokkrar myndir.