Móðurmálsviku lauk með því að nemendur í 9. og 10. bekk var boðið að sjá leikritið Skugga – Svein með kennurum sínum. Leikritið var sýnt í nýju leikhúsi í Kópavogi sem staðsett er við Funalind og ber heitið Leikhúsið.
Leikfélag Kópavogs setti sýninguna upp og voru nemendur og kennarar almennt mjög ánægðir með leikhúsferðina. Myndin var tekin á meðan beðið var eftir rútunni sem fluttu þau á áfangastað.
Nú hafa foreldra allra nemenda átt kost á að koma í morgunkaffi hér í Salaskóla á þessu skólaári. Haldnir voru 20 fundir og mættu 413 foreldrar, eða 75% foreldra.
Í unglingadeild mættu að meðaltali 55% foreldra, á miðstigi mættu að meðaltali 78% foreldra og á yngsta stigi 84% foreldra. Í þeim bekk sem best mæting var mættu foreldrar allra barna en í þeim bekk sem slökust var mæting komu 36% foreldra. Besta mætingin var í lóum, þar var 100% mæting. Steindeplar lentu í 2. sæti með 95% mætingu og mávar í 3. sæti með 90% mætingu.
Við erum að vinna úr matsblöðunum sem foreldrar fylltu út á fundunum. Ljóst er að foreldrar eru mjög ánægðir með skólastarfið og bera mikið traust til kennara. Jafnframt komu fram ágætar ábendingar um það sem betur má fara og eitthvað af tillögum um nýjar leiðir. Skýrslan verður birt á heimasíðunni þegar hún er tilbúin.
Morgunkaffið í Salaskóla hefur öðlast sess í samstarfi skólans við foreldra. Það skilar miklu inn í skólastarfið, byggir upp traust á milli skólans og heimilanna og hjálpar okkur við að byggja upp góðan skóla.
Í dag komu slökkviliðsmenn í heimsókn í skólann og voru með eldvarnarfræðslu hjá nemendum í 3. bekk. Nemendur fengu að skoða bæði sjúkra- og slökkvibíla sem var lagt fyrir utan skólann. Krakkarnir höfðu gaman að heimsókninni og fannst mikið til þess koma að fá að stíga upp í sjúkrabíl og komast í návígi við slökkviliðsbíl. 
Í þessari viku hefur markvisst verið unnið með móðurmálið á öllum stigum í svokallaðri móðurmálsviku. Ljóð hafa verið kyrjuð, upplestur æfður og mikil ritun í gangi svo eitthvað sé nefnt. Margir bekkir fóru á sal til að syngja ýmsar vísur og ljóð með aðstoð tónmenntakennara og ungra hljóðfæraleikara sem allt voru nemendur í skólanum. Nemendur tróðu einnig upp á sal með eigin leikþætti og frumsamin ljóð sem bar vott um frjótt ímyndunarafl þeirra.
SAMKÓP, samtök foreldrafélaga í Kópavogi boða til fræðslufundar næstkomandi fimmtudag, 13. nóvember í Hörðuvallaskóla. Fundurinn hefst kl 20:00. Fulltrúar Heimilis og skóla munu halda erindi sem fjalla um:
1) mikilvægi foreldrastarfs í skólunum
2) nýju grunnskólalögin
3) mjög áhugaverða ráðstefnu sem haldin var í Svíþjóð í haust sem hét “Foreldrar eru auðlind í skólastarfi” –
Fundurinn er opinn öllum!
Nemendur Salaskóla sem skipuðu liðin Ozon og Team Awesomeness í First LEGO League keppninni sem fór fram í Öskju sl. laugardag stóðu sig með mikilli prýði og voru skólanum til mikils sóma. Bæði lið voru tilnefnd til margra verðlauna og þóttu skara fram úr á mörgum sviðum. Í hús kom bikar fyrir góðar dagbókarfærslur Ozon meðan á verkefninu stóð. Með því að smella á linkinn má skoða nánar tilnefningar og úrslit http://www.hi.is/id/1026313.
Hið árlega bekkjarmót í skák hófst í morgun þegar fulltrúar nemenda í 1. – 4. bekk komu saman til þess að tefla í undanrásum. Taflborð voru víða sett upp í skólanum og áhuginn skein úr andlitum hinna ungu skákmanna sem sátu og tefldu af miklum móð.
Bekkjarmótið heldur áfram á næsta mánudag en þá teflir unglingastigið og síðan rekur miðstigið lestina föstudaginn 21. nóvember. Eftir að bekkirnir hafa teflt saman verður lokaúrslit í lok nóvember en þá keppa efstu liðin úr undanrásunum um titilinn besti bekkurinn í skák 2008 í Salaskóla.
Síðustu misseri hafa nemendur fengið prjóna í skólanum til að vinna með heima og mikið af þeim hefur ekki skilað sér til baka. Nú er svo komið að engir prjónar eru til í ákveðnum númerum og viljum við því biðja alla sem hafa fengið prjóna að láni heim, að skila þeim strax. Við erum stopp í verkefnum í nokkrum árgöngum vegna prjónaskorts og eins og er eru prjónar illfáanlegir í bænum.
Einnig ef eitthvað garn er afgangs frá þessum verkefnum, þá biðjum við ykkur vinsamlega að senda það líka til baka. Sé þessum verkefnum ekki lokið, má alltaf fá prjóna lánaða hjá mömmu eða ömmu og skipta svo hægt sé að skila skólaprjónunum.
Við þökkum fyrir góð viðbrögð við kertastubbasöfnuninni, og þiggjum endalaust meira af stubbum.
Kveðja Steinunn textílkennari.