Keppnislið Salaskóla í unglingaflokki fer á morgun, fimmtudag, til Svíþjóðar til að keppa á Norðurlandamóti í liðakeppni skóla í skák.
Keppnin fer fram dagana 10.-14. sept. í Stokkhólmi.
Fylgist með gengi liðsins hér á heimasíðunni um helgina. Linkur á fréttir.
Kennarar unglingadeildar kynntu vetrarstarfið fyrir foreldrum í morgun. Kynningin hófst á sal. Þar voru allir kennarar kynntir og tveir kennarar sýndu foreldrum gagnlega námsvefi. Forstöðumaður félagsmiðstöðvarinnar sagði frá starfinu í vetur. Að þessu loknu fóru foreldrar með umsjónarkennurum í kennslustofur.
Foreldrar fjölmenntu á kynninguna og við erum mjög ánægð með góða mætingu.
Það var mikið fjör í dag þegar nemendur úr fjórða bekk, lundar og teistur, fóru í vettvangsferð að Vífilstaðavatni. Meðferðis voru háfar, prik og box af ýmsum stærðum og gerðum. Þó nokkuð margir gleymdu stígvélum, en létu það ekki stoppa sig, heldur rifu af sér strigaskóna og óðu út í.
Krakkarnir fylltu boxin af lirfum, drullu, gróðri og fleiru girnilegu. Þegar komið var aftur í skólann var öllu hellt í fiskabúr og bíða nú allir spenntir eftir að sjá hvaða líf kviknar í búrinu. Spakmæli dagsins eru: enginn er verri þó hann vökni ! Fleiri myndir
Viðbragðsáætlun Salaskóla var gefin út í dag 3.september 2009. Samkvæmt 15.grein laga um almannavarnir, nr. 82/2008, ber stofnunum á vegum sveitarfélaga að gera viðbragðsáætlun til að takast á við afleiðingar neyðarástands. Viðbragðsáætlun skólanna er samræmd að uppbyggingu. Geymir hún almennar upplýsingar frá almannavarnadeild ríkislögreglustjóra og embætti sóttvarnarlæknis. Nokkra kafla semja skólarnir sjálfir. Hér er hægt að skoða viðbragðsáætlun Salaskóla.
Við höfum gert talsverðar breytingar á valinu í unglingadeildinni, 8. – 10. bekk, í Salaskóla. Markmið okkar er að nemendur fái sem mest út úr kennslunni í valgreinunum og tímarnir nýtist sem best. 8. bekkur fær nú að velja og er það í samræmi við breytingar sem gerðar voru á grunnskólalögum í fyrra. Valtímabilin í vetur verða 6 og á hverju valtímabili verða nemendur að velja 6 kennslustundir alls. Þá eru námskeiðin misveigamikil eða frá 2 kennslustundum á viku upp í 6 kennslustundir. Möguleiki er að velja sömu grein 2-3 yfir veturinn.
Margir nemendur eru í metnaðarfullu og kröfuhörðu íþrótta- og tómstundastarfi utan skólans og ef þeir óska þess munum við meta það sem hluta af námi þeirra í Salaskóla að uppfylltum ákveðnum skilyrðum.
Við vonum að þessar breytingar mælist vel fyrir og verði til þess að við komum betur til móts við nemendur.
Nemendur geta nú valið fyrir fyrsta tímabilið sem stendur til 9. október. Þeir eiga að gera það með því að smella hér .
Hér má nálgast áætlanir fyrir íþróttir í Salaskóla – á haustönn 2009:
Íþróttir í 8. – 10.bekk (pdf-skjal til útprentunar)
Hér koma nokkrar myndir frá skólasetningu 24. ágúst 2009 þegar nemendur í 2. – 10. bekk mættu í fyrsta skipti í skólann.
Búið er að ráða í allar lausar stöður í dægradvöl Salaskóla. Nýr umsjónarmaður eru Auðbjörg Sigurðardóttir og sér hún um daglegt skipulag en skráningar og fjármálaumsýsla er í höndum skólaritara, hennar Ásdísar. Aðrir starfsmenn í dægradvöl eru Svana, Álfheiður, Margrét, Íris Hólm, Birkir og Fatmir.
Við biðjum foreldra um að staðfesta skráningu og dvalartíma hið fyrsta.
Dægradvölin opnar þriðjudaginn 25. ágúst. Við mælumst þá til þess að 1. bekkingar byrji ekki fyrr en daginn eftir og best er að láta þá byrja rólega.