Vel gekk í skákinni hjá ferðalöngum á Bolungarvík. Patrekur Maron Magnússon vann alla sína andstæðinga í 11 skákum og stóð uppi sem sigurvegari í mótinu og er Íslandsmeistari í skólaskák. Jóhanna Björg hafnaði í 5. sæti í sama flokki en í yngri fllokknum tók Guðmundur Kristinn fjórða sætið og Birkir Karl það áttunda. Þetta eru allt gífurlega öflugir skákmenn sem hafa lagt mjög hart að sér. Við óskum þeim til hamingju með glæsilegan árangur.
Fjórir nemendur úr Salaskóla unnu sér inn rétt til að tefla á landsmóti í skólaskák sem fram fer dagana 24.- 27. apríl á Bolungarvík. Það eru þeir Birkir Karl Sigurðsson og Guðmundur Kristinn Lee í yngri flokki en í þeim eldri eru þau Jóhanna Björg Jóhannsdóttir og Patrekur Maron Magnússon. Það fréttist rétt í þessu að Patrekur er efstur í sínum flokki eftir 4 umferðir. Hægt er að fylgjast með stöðunni og gengi okkar fólks á skak.is eða á síðu Taflfélags Bolungarvíkur. Við óskum þeim góðs gengis áfram í taflmennskunni.
Þeir sem eru að flytja í hverfið og ætla að setja börn sín í Salaskóla eru beðnir að tilkynna okkur það sem fyrst. Einnig þurfum við að vita ef börn flytjast úr Salaskóla í annan skóla. Tilkynnið breytingar til skrifstofu Salaskóla í síma 570 4600 – netfang asdissig@kopavogur.is
Á miðnætti á laugardag lauk viðhorfakönnuninni meðal foreldra. Könnunin fór fram á vefnum og alls svöruðu henni 391 foreldri. Gera má ráð fyrir að það séu foreldrar um 70% barna í Salaskóla. Við munum vinna úr könnuninni eins hratt og við getum og kynna niðurstöður fyrir foreldrum. Meðan á heildarvinnslu stendur má búast við glefsum úr niðurstöðum hér á heimasíðu skólans.
Nú þegar liggur fyrir afstaða foreldra í Salaskóla til skólabúninga. 300 foreldrar tóku afstöðu með eða á móti skólabúningum, 91 hafði ekki skoðun eða svörðuðu ekki. Af þeim sem tóku afstöðu voru 40% hlynnt skólabúningum en 60% á móti.
Þegar litið var yfir skólann í dag var eins græn slikja lægi yfir honum enda svokallaður grænn dagur. Nemendur og starfsfólk minntu á það með grænum lit í fötum sínum eða skarti. Dagurinn gekk mjög vel, allir bekkir fóru út á skólalóðina og týndu rusl í poka. Ætti skólalóð og næsta umhverfi að vera mun snyrtilegra núna. Gaman er að geta þess að samvinnuskólar okkar í Comeniusarverkefninu voru að vinna að sama verkefni í sínum heimalöndum. Við fengum góðar kveðjur frá vinum okkar í Finnlandi.
Tilgangurinn er að vekja athygli á hversu mikilvægt er að hlúa að umhverfi sínu. Þegar allir leggjast á eitt næst árangur. Nemendur stóðu sig mjög vel og í verðlaun fyrir þátttöku fengu þau frostpinna í hádeginu sem að sjálfsögðu var grænn á litinn. 
Á morgun, fimmtudaginn 17.apríl, er svokallaður Græni dagurinn hér í Salaskóla. Þá ætlum við að huga að nánasta umhverfi okkar og skoða hvað við getum gert til að fegra umhverfi skólans og næsta nágrenni. Það er mælst til þess að bæði nemendur og starfsfólk mæti í einhverju grænu í skólann þennan dag. Það geta verið föt, húfur, sólgleraugu og annað í þeim dúr. Breiðabliksföt gætu t.d. nýst vel í þetta.
Þó nokkrar breytingar eru fyrirhugaðar á skipulagi kennslu á öllum aldursstigum í haust. Kennarar hafa farið vandlega í saumana á kennsluháttum og skoðað hvað má betur fara. Einnig hafa niðurstöður úr PISA og samræmdum prófum verið til skoðunar sem og umræður og tillögur foreldra sem komu fram í morgunkaffinu fyrr í vetur.
Niðurstaða okkar kemur fram í tveimur viðamiklum þróunarverkefnum sem þegar er byrjað að vinna að. Annað verkefnið nær yfir 1. – 7. bekk og þar er líklega sýnilegasta breytingin sú að bekkir verða ekki lengur aldursblandaðir, heldur verða í hverjum bekk nemendur sem fæddir eru á sama ári. Hver bekkur mun hins vegar eiga sér samstarfsbekk einum árgangi ofar eða neðar. Bekkirnir munu svo vinna saman að verkefnum þar sem aldursblöndun hentar vel.
Á unglingastigi verður skipulagi breytt þannig að auðveldara verði að koma til móts við ólíkan námsstíl nemenda. Hugmyndir okkar ganga út á að taka að hluta til upp áfangakerfi svipað og þekkist í framhaldsskólum, auka vinnu að stórum verkefnum, búa til leið fyrir nemendur sem eru mjög sjálfstæðir í námi og auka þátt list- og verkgreina á unglingastigi.
Við ætlum að auka fjölbreytni í kennsluháttum í öllum árgöngum. Gera starfið fjölbreyttara og freista þess að gera starfið í skólanum áhugavert fyrir alla nemendur.
Fljótlega verða foreldrar boðnir á frekari kynningu á þessum hugmyndum. Þær eru í mótun og vinnslu þó svo að meginlínur liggi fyrir. Þess má geta að sótt hefur verið um styrki til að vinna þessi verkefni.
