Rithöfundurinn, Þorgrímur Þráinsson, heimsótti okkur í dag og átti erindi við nemendur í 5. – 7. bekk. Eftir lestrarkeppnina sem lauk um miðjan nóvember sýndu krakkarnir á miðstiginu áhuga á að fá Þorgrím í heimsókn. Þorgrímur tók vel í það, kom og las upp fyrir nemendur úr nýjustu bókinni sinni „Krakkinn sem hvarf“ og sagði frá helstu aðalpersónunum í bókinni. Í lokin spurðu nemendur Þorgrím spurninga af ýmsu tagi t.d. hvenær hann hafi skrifað fyrstu bókina sína, hvað hann væri lengi að skrifa eina bók, hvernig hugmyndirnar kæmu í kollinn á honum og fleira í þeim dúr. Nemendurnir okkar voru sannarlega góðir hlutstendur, kurteisir í alla staði og tóku afar vel á móti gestinum okkar. Takk fyrir heimsóknina, Þorgrímur Þráinsson!

Eins og fram kom í haust er lestrarkeppnin Lesum meira í gangi á miðstigi, 5. – 7. bekk. Meginmarkmið keppninnar er að nemendur verði víðlesnari, auki orðaforða sinn og áhugi á bókalestri eflist. Í fyrstu var gefinn góður tími fyrir lestur áveðinna bóka á bókalista keppninnar  og síðan var dregið um hvaða bekkir ættu að keppa saman. Í keppninni reynir jafnt á almenna þekkingu nemenda sem þekkingu á ýmsu í heimi bókmenntanna auk þess að kunna vel skil á ákveðnum sögum.

Nú þegar eru búnar þrjár keppnir og sú fjórða verður á morgun, miðvikudag, þegar svölur og súlur etja kappi saman. Liðin samanstanda af þremur nemendum en stuðningsliðið, sem er bekkurinn, skipar stórt hlutverk því eins og gefur að skilja er mjög mikilvægt að styðja vel við sitt lið, hvetja og fagna á réttum stöðum og sýna í alla staði háttprúða framkomu. Einnig má beina einni spurningu til bekkjarins ef liðið stendur á gati.  Bekkirnir mæta prúðbúnir til leiks því hver bekkur skartar ákveðnum litum. Þetta eru miklar skrautsýningar bæði er varðar föt og andlitsmálningu. Ekki má gleyma hvatningaspjöldunum sem að sjálfsögðu eru líka í réttum litum. Sumir bekkir hafa jafnvel troðið upp með atriði til að styðja enn betur við liðið sitt. Á meðfylgjandi myndum sést annars vegar lið ritanna spreyta sig í síðustu viku á spurningum sem fyrir það voru lagt – hins vegar eru glæsileg stuðningslið teista og rita í salnum.   

Í dag hófst formlegur undirbúningur fyrir lestrarkeppnina LESUM MEIRA sem nemendur á miðstigi taka þátt í síðar í vetur en þá munu bekkjardeildir miðstigs keppa sín á milli. Keppnin er samvinna skólasafns og kennara miðstigs en sex skólar í Kópavogi standa að slíkri keppni í ár innan síns skóla. Markmiðið með þessu er að nemendur verði víðlesnari, auki við orðaforða sinn og áhugi á bókalestri eflist. 
Krakkarnir hafa nú fengið inn í skólastofuna sína bókakassa með þeim bókum sem gefnar eru upp fyrir keppnina og eiga að lesa sem mest fram í aðra viku í október. Þá byrjar lestrarkeppni á milli bekkja þar sem tveir og tveir bekkir keppa sín á milli er endar með því að einn bekkur stendur uppi sem sigurvegari. Hver bekkur þarf að velja sér fimm manna lið (3 aðalmenn og 2 varamenn) en hinir í bekknum eru svokallaðir bakhjarlar sem hægt er að leita til í keppninni.

Fyrirkomulag keppninnar minnir á ÚTSVARIÐ á RÚV fyrir þá sem þekkja það en um er að ræða hraða-, vísbendinga-, ágiskunar- og valflokkaspurningar. Ekki er einungis spurt úr bókum á bókalista heldur er einnig gott að vera vel að sér í bókmenntaheiminum og hafa lesið í gegnum tíðina, vita um íslenska höfunda, bókatitla og fleira. Keppnin fer vel af stað því það var mikill hugur í mönnum við lesturinn í morgun. Vonandi halda krakkarnir áfram að vera svo áhugasamir og kappsfullir. Þeir sem eiga erfitt með lestur geta nýtt sér hljóðbækur. Hér er hægt að lesa nánar um keppnina og sjá bókalistann sem unnið er út frá. 

Nemendur í öðrum bekk buðu foreldrum sínum að koma í skólann í morgun til að sjá afrakstur vinnu undanfarinna vikna. Þau hafa verið að æfa upplestur og framsögn og fóru með kvæðið Saga af Suðurnesjum eftir Jóhannes úr Kötlum í sal skólans –  en kvæðið þuldu þau upp reiprennandi hvert í kapp við annað. Á eftir var foreldrum boðið að koma á svæði fyrir framan kennslustofur nemenda þar sem búið var að stilla upp ýmsu sem tengdist þemanum Land og þjóð  sem hefur verið í gangi í nokkurn tíma. Þar var fjallað um allt sem þjóðlegt er svo sem þjóðbúninginn, fánann og skjaldarmerkið, í máli sem myndum. Í tilefni dagsins höfðu umsjónarkennararnir þeirra klætt sig upp í þjóðbúning og einnig mátti sjá nokkra prúðbúna nemendur í sama stíl en allir nemendurnir klæddust lopapeysum í dag að góðum og þjóðlegum sið.  Myndir.  

Stóra upplestrarkeppni 7. bekkja í Kópavogi var haldin á dögunum í Salnum í Kópavogi. Arna Katrín Kristinsdóttir og Rebekka Ósk Svavarsdóttir lásu upp fyrir Salaskóla og stóðu sig með mikilli prýði.

Allir nemendur Salaskóla  lögðu við hlustir í morgun þegar ný íslensk smásaga var flutt á Rás 1. Alþjóðasamtökin IBBY (The International Board on Books for Young People) fagna degi barnabókarinnar í dag en markmið þeirra samtaka er að vekja athygli á sameiningarmættinum sem býr í barnabókmenntum. Í tilefni dagsins var ný saga eftir Kristínu Helgu Gunnarsdóttur, barnabókahöfund, lesin upp í útvarpinu. Sagan á að höfða til allra aldurshópa en hún segir af systkinunum Hörpu og Val sem lenda í ýmsum ævintýrum á leiðinni í skólann. Eftir sögulesturinn spunnust góðar umræður í bekkjunum um efni sögunnar.