Gagnsafn skólans er bilað og það veldur því að ekki er hægt að opna ýmsar upplýsingar. Viðgerð stendur yfir en við bendum lesendum á að matseðill og skóladagatal er aðgengilegt hér til hliðar á síðunni.
Category Archives: Fréttir
Ávextir í 1. – 5. bekk
199 foreldrar svöruðu könnun okkar um ávextina. Niðurstöður voru þær að 158 kváðust vilja að skólinn sæi um ávextina gegn 30 kr. greiðslu frá foreldrum á dag. 41 sagðist fremur vilja senda börn sín með nesti.
Við höfum því ákveðið að bjóða foreldrum nemenda í 1. – 5. bekk að kaupa ávexti í áskrift fyrir 30 kr. á dag.
Til að einfalda okkur vinnuna biðjum við þá sem ætla ekki að vera í ávaxtaáskrift að láta okkur vita með því að senda okkur tölvupóst á ritari@salaskoli.is eða svara þessum tölvupósti. Við gerum ráð fyrir að þeir sem láta okkur ekki vita, ætli að kaupa áskrift. Mikilvægt er þeir sem ekki ætla að vera með svari strax og eigi síðar en fimmtudaginn 21. október.
Skáldkonur í heimsókn
Skáldkonurnar Vilborg Davíðsdóttir og Sigurbjörg Þrastardóttir komu í heimsókn í skólann í morgun og hittu nemendur í 9. og 10. bekk. Þær sögðu frá textum í ljóðum sínum og skáldsögum og hvernig þeir kvikna og verða til.
Þær sýndu fram á að allir geta tjáð sig í skrifum og hvöttu nemendur til skapandi hugsunar og skrifa. Vilborg hefur m.a. skrifað Korku sögu og Auði og bækur Sigurbjargar eru t.d. Sólar saga og Blysfarir. Það er alltaf fengur af heimsókn sem þessari og gaman að sjá hve nemendur okkar voru áhugasamir um efnið.
Fræðst um fjöruna
Krakkarnir í 5. bekk hafa verið að læra um fjöruna undanfarnar vikur. Þeir eru búnir að fara og skoða Sjóminjasafnið Víkina og síðan var fjaran í Kópavoginum skoðuð. Í framhaldi eru krakkarnir að vinna ýmiss verkefni um fjöruna. Myndir úr ferðinni eru inni á myndasafni skólans.
Myndir frá fjölgreindaleikum
Myndir frá fjölgreindaleikunum 29. – 30. sept. eru komnar inn á myndasafn skólans. Skoðið hér. 
Foreldraviðtalsdagur
Á mánudaginn er foreldraviðtalsdagur í Salaskóla eins og kemur fram á skóladagatali og umsjónarkennarar hafa upplýst um. Þá ræða kennarar við sérhvern nemanda og foreldra hans um gengi í náminu og það sem mikilvægt er að gera á næstu mánuðum. Foreldrar geta líka hitt sérgreinakennara og rætt við þá.
Enginn skóli er að öðru leyti þennan dag en dægradvölin er opin frá kl. 8:10 – 17:15. Þeir sem ekki eru í dægradvöl geta fengið að vera þar til 13:30 gegn gjaldi en mikilvægt að foreldrar tilkynni okkur það með því að senda póst á egg@kopavogur.is
Fjölgreindaleikar
Efnt verður til níundu fjölgreindaleika Salaskóla dagana 6. og 7. október Allir nemendur taka þátt í leikunum og er þeim skipt í 40 hópa og í hverjum hópi eru nemendur af öllum skólastigum. Keppnisgreinar eru 40 og hver hópur keppir í öllum greinum. Keppnisgreinar reyna á allar greindir og fjölbreytni er afar mikil. Þennan dag mætir starfsfólk í furðufötum.