reykjafara

Sjöundubekkingar á Reykjum þessa vikuna

reykjafara
Eftirfarandi fréttir bárust frá Reykjum í dag þar sem sjöundubekkingar dvelja um vikutíma: „Reykjafararnir komu í skólabúðirnar á hádegi í gær og gekk ferðalagið vel. Krakkarnir una sér nú við leik og störf í Reykjaskóla og standa sig og skemmta sér frábærlega“.

Skólabúðirnar á Reykjum hafa mörg markmið að leiðarljósi í sínu starfi og leggja m.a. áherslu á að  að örva löngun nemenda til að athuga og rannsaka umhverfið, auka athyglisgáfu þeirra og þroska sjálfstæði. Þetta er 25. árið sem búðirnar starfa. Við óskum sjöundubekkingunum okkar góðs gengis í starfinu á Reykjum.  Heimasíða Reykjaskóla


candle

Kertastubbar óskast

candle
Á hverju ári fer 5. bekkur í kertagerð í smiðjum auk tilfallandi kertagerðatíma hjá öðrum árgöngum. En til þess að geta endurnýtt kertaafganga, þurfum við hráefni.  Við getum notað ÖLL kerti (nema sprittkerti) , bæði heil og hálf og smástubba, líka vaxið sem hefur lekið niður á diskinn  og kerti í glösum!  Endilega sendið okkur kertabúta.  Eins og staðan er núna þá vantar okkur mest hvít kerti, en við þiggjum samt alla liti.  Við flokkum þá og bræðum niður, skerum í litla kubba og gerum svo kubbakerti, þar sem hvítu vaxi er svo hellt yfir kubbana.  Kertin sem við gerum eru ýmist sett í mót eða beint í glerkrukkur, svo við söfnum einnig litlum glerkrukkum, til dæmis undan sultu eða barnamat.

Kveðja Steinunn og Agnes smiðjukennarar. 

arnaldur

Allir glaðir á fjölgreindaleikum

arnaldur
Seinni dagur fjölgreindaleikanna 
var í dag. Krakkarnir kepptust við að leysa hinar ýmsu þrautir sem fyrir þá voru lagðar og gaman var að sjá hversu samvinnan var góð. Þegar krakkarnir voru spurðir hver væri skemmtilegasta stöðin á leikunum fannst þeim erfitt að komast að ákveðinni niðurstöðu. Sumir byrjuðu kannski á að segja dansinn, en bættu þá við að smíðin væri líka skemmtileg, og… bandýið og … fuglastöðin og ..kapplakubbarnir – og þannig var haldið áfram að telja upp. Sumir höfðu þó vaðið fyrir neðan sig og svöruðu að ALLT á fjölgreindaleikunum væri skemmtilegt. Einfalt og gott svar. Það er mál manna að aldrei hafi tekist eins vel til með leikana og núna. Krakkarnir voru einstaklega duglegir og vinnusamir, hópmeðlimir unnu mjög vel saman, vel gekk að fara á milli stöðva og fyrirliðarnir voru til fyrirmyndar.

Það er greinilegt að þrautalausnir krefjast orku því krakkarnir tóku vel til matar síns í hádeginu og gerðu pylsunum góð skil. Síðan var boðið upp á ís í eftirrétt til hátíðabrigða. Bros lék um varir nemenda þegar þau skunduðu heim úr skólanum í dag. Á morgun, föstudaginn 4. okt., er samstarfsdagur kennara í Kópavogi og því frí í skólanum. Krakkarnir eiga að mæta aftur í skólann á mánudaginn skv. stundaskrá.

Lesið meira um fjölgreindaleikana.         

Myndir frá seinni degi fjölgreindaleika.

 

gladir_krakkar

Fjölgreindirnar á dagskrá í 11. skipti

gladir_krakkar

Þegar farið var að grennslast nánar fyrir um þessi furðudýr og skrítnu mannverur (sjá frétt hér á undan) kom í ljós að í dag er fyrri dagur fjölgreindaleika Salaskóla. Þá er öllum krökkum í skólanum skipt niður í hópa, u.þ.b. 12 krakkar í hóp, eldri sem yngri saman í hóp ásamt tveimur fyrirliðum er eiga að sjá um að allt fari vel fram. Hópurinn fer á milli 40 stöðva þar sem reynir á mismunandi hæfni hópmeðlima og hver og einn í hópnum leggur sitt af mörkum allt eftir hæfileikum sínum og getu. Sem dæmi má nefna að sumir eru betri en aðrir í að greina bragð, að þekkja fána, saga út, sparka stígvéli og hitta bolta í körfu. Þau yngri eru oft betri en þau eldri í einhverju – og öfugt. Á hverri stöð er stöðvarstjóri sem útskýrir í hverju verkefnið felst. Stöðvarstjórinn er ávallt kennari/starfsmaður sem er klæddur í grímubúning eða furðuföt. Þá er málið upplýst sem betur fer og kennararnir voru á sínum stað í morgun en voru bara óþekkjanlegir.

Fjölgreindaleikarnir, í öllu sínu veldi, eru sem sagt haldnir í Salaskóla í dag í 11. skipti, nemendum og starfsfólki til mikillar ánægju. Þar er eitt af aðalmarkmiðunum að hver og einn nemandi fái að njóta sín á sínum eigin forsendum. Leikarnir gengu afar vel í dag og við hlökkum til seinni hluta leikanna á morgun.

Sjá myndir frá morgninum og af skrítnum stöðvarstjórum.

forsida

Hvaða dagur er eiginlega í dag?

forsidaMiðvikudagurinn 2. október rann upp, mildur en dálítið blautur. Krakkar og kennarar Salaskóla drifu sig á fætur og fóru að búa sig í skólann. En það var eitthvað öðruvísi við þennan dag en aðra daga. Krakkarnir voru að vísu mættir á réttum tíma með bros á vör og mjög eðlilegir á að líta. En það leit ekki út fyrir að einhverjir kennarar væru í skólanum. Hvað varð um kennara Salaskóla? Mættu þeir aldrei í skólann?  Það var enginn þeirra sjáanlegur en þess í stað fylltist kennarastofan kl. 8 af afar sérkennilegu fólki (jafnvel ófrýnilegu) og inn á milli voru alls kyns dýr. Óó…. þetta leit ekki vel út. Hvernig átti t.d. tígri að kenna íþróttir, Mexíkani íslensku og belja stærðfræði. Hver vill t.d. láta vampýru kenna sér náttúrufræði? Nei, nei… hvað er að sjá! Þarna situr pandabjörn þar sem ritarinn er vanur að sitja og kjaftar í símann.  Er allt að fara úr böndunum í skólanum? Hvar eru eiginlega Hafsteinn og Hrefna? Við hjá salaskoli.is munum flytja ykkur fréttir af þessu skrítna ástandi um leið og eitthvað fer að skýrast. Ljósmyndari er á staðnum og mun sýna fleiri myndir af þessu ófremdarástandi innan tíðar.

lesadagur

9. sept. – skemmtilegur dagur

lesadagur
Síðastliðinn föstudag var gríðarlega góð þátttaka í Göngum saman átakinu sem við sögðum frá fyrir helgi hér á heimasíðunni. Sumir nemendur voru afar duglegir og gengu mjög langa leið í skólann sem var mikill dugnaður svona í morgunsárið. Þegar komið var í skólann voru verkefni einkum tengd lestri því verið var að halda upp á Dag læsis. Vinabekkir hittust og gaman var að sjá hvernig stórir og smáir sameinuðust í lestrinum. Þau eldri lásu gjarnan fyrir þau yngri, krakkarnir skrifuðu saman sögur og margir sökktu sér djúpt niður í lesturinn. Alls staðar var lesið, undir borðum, upp á borðum, undir stigum, saman við borð, í krókum, í fataklefum og gjarnan var vasaljós notað við lesturinn. Nemendur mættu í náttfötum í skólann þennan dag sem setti notalegan blæ á daginn og gerði lesturinn einhvern veginn svo „kósí“. Skoðið myndir frá þessum skemmtilega degi.   

IMG_0053

Skólaárið 2013 – 2014

 

Ágúst
Skólasetning 2013
September
Göngum og lesum saman 

Október
Fjölgreindaleikar – fyrri dagur
Fjölgreindaleikar – seinni dagur

Stöðvarstjórar fjölgreindaleika 

Nóvember
Lesum meira – lestrarkeppnin

Desember
Fimmtubekkingar láta gott af sér leiða

Rithöfundur kemur í heimsókn
Gerð jólaþorpsins
Jólaþorpið-þema í 7. og 8. bekk 

Janúar
Febrúar

Hundraðdagahátiðin í 1. bekk 

 
 
 
 

IMG_0053

radlagdurskammtur

Göngum og lesum

radlagdurskammtur
Við hér í Salaskóla ætlum að taka þátt í átakinu Göngum í skólann 2013 og hvetjum alla, bæði nemendur og starfsfólk, til að vera með og byrja átakið okkar með því að ganga eða hjóla í skólann á næstkomandi mánudag, 9. september. Meðfylgjandi er góð ráð um daglega hreyfingu sem getur verið fróðlegt að kíkja aðeins á.  Smellið á myndina til að stækka.

Á mánudaginn ætlum við líka að halda upp á Dag læsis sem er 8. september. Þá verður bryddað upp á ýmsu á aldursstigunum í þágu lesturs og læsis. Sem dæmi má nefna að nemendur á miðstigi eru í óða önn að undirbúa þátttöku sína í lestrarkeppninni Lesum meira.  Í þeirri keppni taka þátt margir grunnskólar í Kópavogi þar sem aðalmarkmiðið er að nemendur verði víðlesnari, auki við orðaforða sinn og að áhugi á bókalestri eflist. Ákveðnar bækur eru „í pottinum“ og nú er um að gera fyrir bekkina að fara að undirbúa sig með því að allir nemendur lesi eins mikið og þeir komast yfir. Hljóðbækur eru gjarnan notaðar í þessu átaki.
readgongum-foreldri   

skolinnbyrjar

Skólinn settur

skolinnbyrjar
Í dag, 21. ágúst, var Salaskóli settur í 13 sinn en þá mættu nemendur í andyri skólans og voru skipaðir í bekki af skólastjórnendum. Síðan fóru þeir með umsjónarkennara sínum í kennslustofu bekkjarins þar sem afhent var stundaskrá og spjallað saman. Margir foreldrar fylgdu börnum sínum til skóla í dag. Það er alltaf eftirvænting hjá krökkunum að byrja aftur, gaman að hitta félagana og setja dagana í fastar skorður. Flestir eru broshýrir, jafnvel sposkir á svipinn en aðrir hljóðir og pínulítið feimnir sem er afar eðlilegt við þessar aðstæður. Í Salaskóla eru um 520 nemendur núna og hafa þeir aldrei verið fleiri, af þeim sökum er búið að setja niður tvær lausar skólastofur á skólalóðinni sem hafa fengið heitin Fjallasalur og Skógarsalur. Við, starfsfólkið í Salaskóla, hlökkum til starfsins í vetur. Skóli hefst samkvæmt sundaskrá á morgun, föstudag, hjá öllum nema 1. bekkingum sem verða boðaðir sérstaklega. Myndir frá skólasetningu.

Sumarleyfi

Skrifstofa Salaskóla er lokuð vegna sumarleyfa frá 18. júní. Opnað verður aftur  8. ágúst. Hægt er að skrá nýja nemendur í skólann hér á vefnum. Einnig er hægt að koma áríðandi skilaboðum til skólans með því að senda tölvupóst til skólastjóra hafsteinn@salaskoli.is  Hafið það gott í sumar.