Inn á myndasafn Salaskóla eru komnar myndir frá Öskudagsskemmtuninni sem haldin var í skólanum. Einnig eru myndir frá heimsókn leikskólans Fífusölum sem var á dögunum.
Category Archives: Fréttir
Örugg netnotkun
Í dag og á morgun, þriðjudag, eru kynningar fyrir nemendur í 5. – 10. bekk um örugga netnotkun. Þetta er liður í vakningarverkefni sem foreldrasamtökin Heimili og skóli standa fyrir í skólum. Foreldrar voru á fundi snemma í morgun þar sem farið var yfir ýmsa þætti þessa máls og þótti mönnum margt áhugavert koma fram.
Foreldrum er bent á vefsíðuna www.saft.is þar sem hægt er að sækja góðar ábendingar t.d. eins og Netorðin fimm.
Sjá einnig frétt hér að neðan í tengslum við fundarboð á ofangreindan fund foreldra.
Innritun nýrra nemenda 9. og 10. mars
Mánudaginn 9. og þriðjudaginn 10. mars verður innritun nýrra nemenda í Salaskóla fyrir næsta skólaár. Þá eiga væntanlegir 1. bekkingar að koma ásamt foreldrum sínum og skrá sig í skólann. Einnig er æskilegt að innrita önnur börn sem eiga að sækja Salaskóla skólaárið 2009-2010 innriti sig þessa daga.
Innritun stendur yfir frá kl. 8:30 – 15:00 báða dagana. Boðið er upp á skoðunarferð um skólann og svolitla kynningu á starfinu kl. 9:00 báða dagana.
Samvinnubekkir og samstarf kennara
Samvinnubekkir og samstarf kennara
Lokaskýrsla um þróunarverkefnið (júní 2009)
Áfangaskýrsla (jan. 2009)
Upphaf verkefnisins
Verkefnið fór af stað í maí 2008 með því að kennarar í 2. – 7. bekk ræddu saman í teymum (2.-3. bekkjarteymi, 4.-5. bekkjarteymi og 6.-7. bekkjarteymi) sínum um markmið og útfærslu. Í skólanum voru bekkir á þessum stigum aldursblandaðir en í júní var raðað upp á nýtt í bekki þannig að í hverjum bekk voru börn fædd á sama ári.
Verkefnisstjórn
Fyrir upphaf skólaárs í ágúst var skipuð verkefnisstjórn og í henni á sæti einn fulltrúi úr hverju teymi. Ákveðið var að gefa teymunum svolítið lausan tauminn á haustönn með skipulag og nálgun á verkefninu með það í huga að fá fram fjölbreyttari nálgun og mismunandi hugmyndir. Verkefnisstjórn hefur því átt nokkuð náðuga daga fram að þessu til þess að leyfa mörgum hugmyndum að koma fram og þróast, en þeim mun meiri vinna hefur lent á hverju kennarateymi. Verkefnisstjórnin tekur nú til óspilltra málanna við að láta teymin kynna það sem þau hafa verið að gera hvert fyrir öðru og er fyrsti kynningarfundur í byrjun febrúar. Verkefnisstjórnin mun einnig vinna að tillögum fyrir stundaskrárgerð næsta skólaárs, en stundaskrá hefur svolítið hamlað framkvæmd og ljóst að þar má gera betur.
Framkvæmd
Í 2. og 3. bekk eru 5 bekkjardeildir. Það reyndist því örðugt að setja tvo og tvo bekki saman og búa þannig til tvíburabekki, eins og ætlunin var. Ákveðið var því að tveir bekkir, einn úr hvorum árgangi, ynnu saman sem tvíburabekkir, en hinir þrír bekkirnir skiptust í þrjá blandaða hópa. Fjórar kennslustundir á viku voru festar fyrir samstarfið. Unnið var með eitt þema, „Komdu og skoðaðu fjöllin“ og gekk það að mörgu leyti vel. Við mat á verkefninu var þó samdóma álit kennara að það hefði náð yfir of langan tíma eða 12 vikur. Næsta þema mun verða mun styttra og ná yfir 5 vikur.
Í 4. – 5. bekk var sama staða og í 2. – 3. bekk, þ.e. tvær bekkjardeildir í öðrum árganginum en þrjár í hinum. Í fyrstu var öllum hópnum blandað saman og myndaðir úr honum fimm árgangablandaðir hópar. Það þótti svo ekki gefast nógu vel og var því tekið upp sama fyrirkomulag og í 2. – 3. bekk. Fjórar kennslustundir voru festar á töflu undir samstarfið. Unnin voru þrjú samstarfverkefni mislöng. Eitt var um Leif Eiríksson, annað um boðorðin tíu og það þriðja um jólasveina. Auk þess blanda kennarar bekkjum sínum einu sinni í mánuði í svokallað stórval og þá velja nemendur mismunandi verkefni til að vinna að saman, óháð aldri.
Í 6. og 7 bekk eru tveir bekkir í hvorum árgangi. Þar er samstarf milli árganga skipt í nokkra þætti. Í fyrsta lagi er námsleið sem kölluð er hraðbraut en þar er nemendum úr báðum árgöngum blandað saman í fjóra árgangablandaða hópa. Hver hópur fer svo í gegnum stutt en hnitmiðuð námskeið í ýmsum greinum. Lögð er áhersla á bóklegar greinar og tölvur í þessum námskeiðum. Hvert námskeið stendur yfir í þrjár vikur, þrisvar í viku í klukkustund í senn. Annar þáttur er tungumálainnlit en þá er nemendum úr 5. – 7. bekk blandað saman í námshópa og þeir fá innsýn inn í tungumál sem fæst íslensk börn hafa á valdi sínu og grunnur þeirra því sá sami. Tungumálainnlit er í 8 vikur, 2 stundir á viku. Í þriðja lagi er nemendum í 6. og 7. bekk skipt í hópa eftir námsfögum þegar líður að prófum og búa nemendur í hverjum hópi til ákveðinn fjölda spurninga úr sínu fagi. Síðan er útbúinn spennandi spurningakeppni sem hjálpar nemendum að rifja upp námsefni annarinnar, auk þess að efla samkennd og samvinnu meðal þeirra.
Á vorönn halda hraðbrautir áfram og auk þess verður landafræði Evrópu tekin fyrir í samvinnu árganganna. Hugmyndin er að tengja vinnuna söngvakeppni sjónvarpsstöðva í Evrópu. Þá er ætlunin að taka einnig fyrir verkefni sem höfða til áhugasviðs nemenda og verkefni sem heitir Fyrirtækið mitt.
Undirbúningsvinna kennara
Þessari vinnu fylgir talsverður undirbúningur. Hann felst annars vegar í skipulagningu vinnunnar í hana hefur farið talsverður tími. Hins vegar krefst þetta verulegs faglegs undirbúnings þar sem kennsla er í mörgu frábrugðin hefðbundnum nálgunum viðfangsefnisins.
Framhald vinnunnar
Á vorönn verður vinnu haldið áfram með líkum hætti en þó eru sniðnir af vankantar sem hafa komið upp. Um það hefur verið fjallað hér að ofan. Þá mun verkefnisstjórnin halda þrjá stóra vinnufundi þar sem kennarar kynna hver fyrir öðrum og fyrir öllum kennurum skólans það sem þeir hafa verið að gera. Verkefnisstjórn mun einnig koma að vinnu við stundaskrá næsta skólaárs þannig að auðveldara verði að koma á samstarfi milli árganga en reyndist í vetur.
Salaskóla 20. janúar 2009
Hafsteinn Karlsson, skólastjóri.
Foreldrar athugið
Athygli foreldra og forráðamanna er vakin á nýjum tengli undir hnappnum foreldrar hér á síðunni, Óveður – röskun, þar sem kynnt eru tvö viðbúnaðarstig sem farið skal eftir ef veður eru vond og aðstæður krefjast þess að farið sé með gát. Foreldrar eru vinsamlega beðnir um að kynna sér þessi mál nánar. Textinn er á fleiri tungumálum.
Röskun á skólastarfi vegna óveðurs
Tilmæli um viðbrögð foreldra og forráðamanna
Stjórn Slökkviliðs höfuðborgarsvæðisins (SHS), skipuð framkvæmdastjórum sveitarfélaganna á
höfuðborgarsvæðinu, fól SHS að útbúa, í samvinnu við fræðsluyfirvöld allra sveitarfélaganna,
reglur fyrir foreldra og skólayfirvöld um röskun á skólastarfi vegna óveðurs.
Sjá nánar með því að smella á viðeigandi skjöl:
Þjóðdansar í 2. – 3. bekk
Snemma dags glumdi harmonikkutónlist úr sal skólans. Þegar betur var að gáð voru nemendur í 2. – 3. bekk að æfa þjóðdansa með kennrurunum sínum því að þeir eru að vinna að verkefni um þessar mundir sem heitir "land og þjóð". Liður í því verkefni er að kynnast gömlum hefðum eins og þjóðdönsum og þjóðbúningum en í salnum í morgun mátti einmitt sjá tvær uppábúnar konur í þjóðbúningi og eina stúlku í 3. bekk. Krakkarnir höfðu auðsjáanlega gaman að því að dansa hringdans og marsera. Fleiri myndir.
Fundur fyrir foreldra í 5. – 10. bekk
Að undanförnu hefur öryggi barna og unglinga á Netinu mikið verið til umræðu. Þrátt fyrir að margt gott sé að finna á Netinu er þar líka ýmislegt sem þarf að varast og þar geta þrifist hættuleg og neikvæð samskipti. Að þessu tilefni hafa samtökin Heimili og skóli sett af stað vakningarverkefni um jákvæða og örugga notkun barna og unglinga á Netinu. Vakningarverkefnið felst í kynningum fyrir nemendur og foreldra þeirra.´
Í næstu viku verða fundir fyrir nemendur í 5. – 10. bekk hér í Salaskóla og þriðjudaginn 3. mars eru foreldrar boðaðir til fundar kl. 8:00 – 9:00.
Internetið er frábær upplýsingaveita og tæki til samskipta en þar felast einnig ýmsar hættur sem mikilvægt er fyrir foreldra að þekkja og gera sér grein fyrir. Til að foreldrar geti talað við börnin sín og leiðbeint þeim um öryggi og góða hegðun þurfa þeir að þekkja það umhverfi sem þeir eru í dags daglega. Leiðbeiningar um "umferðarreglur" á netinu eru því orðinn einskonar hluti af uppeldishlutverkinu.
Á fyrirlestrinum verður farið í gegnum svipaða hluti og með nemendum, en einnig rætt hvernig foreldrar sjá netnotkun barnanna sinna og svo hvernig börnin upplifa netnotkun sína og samskipti sín við foreldra. Á fyrirlestrinum verður farið í gegnum bloggsíður, tölfræðilegar upplýsingar, msn einelti, netið og friðhelgi einkalífsins, netvini, nettælingu og ræða aðeins um kynslóðabilið þ.e. hvers vegna foreldrar skilja ekki tölvunotkun barna sinna.
Við hvetjum foreldra til að mæta á þennan fund.
Velheppnuð vinavika
Vinaviku er lokið og það er álit manna að vel hafi tekist til. Vinabekkir heimsóttu hvern annan og unnu að ýmsum skemmtilegum verkefnum í skólanum. í lokin voru svo vinbekkirnir kallaðir saman á sal þar sem farið var í leiki sem tengdust vináttu og hjálpsemi. Eldri nemendur voru einstaklega ábyrgðarfullir og sýndu þeim yngri mikla umhyggju. Í myndasafni skólans er fjöldi mynda frá vinavikunni.
Öskudagsskemmtun í Salaskóla
Á öskudag verður skemmtun í Salaskóla fyrir alla krakka í 1. – 7. bekk. Hún hefst kl. 13:00 og lýkur kl. 14:30. Allir eiga að mæta í grímubúningi eða öðruvísi en venjulega. Stiginn verður dans, farið í leiki, valinn frumlegasti búningurinn og svo er hægt að fá andlitsmálun fyrir þá sem vilja.
Að þessari skemmtun standa Foreldrafélagið, Salaskóli og Fönix.