Salaskóli verður með sérstaka dagskrá 6. – 8. maí í tilefni afmælis bæjarins. Krakkarnir kynnast bænum sínum með því að ferðast um bæinn gangandi eða í strætó og skoða ýmsa staði, kynna sér söguna, náttúruna, menninguna og mannlífið. Einnig vinna þau verkefni um bæinn, fara í ratleiki og aðra skemmtilega leiki, syngja Kópavogslög og taka myndir og teikna myndir. Föstudaginn 8. maí verður grillveisla á skólalóðinni.
Við skiptum krökkunum í 12-14 manna hópa og í hverjum hópi eru nemendur á öllum aldri, eins og á fjölgreindaleikunum. Elstu nemendur eru hópstjórar. Þessa daga hefst skólastarf kl. 830 og lýkur kl. 1315. Skólinn opnar að sjálfsögðu á sama tíma og venjulega. Ekki er val eða sundkennsla þessa daga. Til að einfalda málin eiga allir að koma með nesti fyrir kaffið þessa daga, þe. samloku/ávöxt og vatn eða djús til að drekka. Fínt að hafa það í litlum íþróttapoka því þau eru að þvælast út um allt. Athugið að nestið verður að vera hnetulaust!
Category Archives: Fréttir
Kópurinn – viðurkenningar skólanefndar Kópavogs
Skólanefnd Kópavogs auglýsir hér með eftir tilnefningum til viðurkenninga fyrir framúrskarandi skólastarf í grunnskólum Kópavogs.
Viðurkenningar verða veittar fyrir 3 – 5 verkefni sem stuðla að nýbreytni og framþróun innan skólanna. Með því er átt við nýjungar í skólastarfi eða þróunarverkefni sem fela í sér umbætur eða leiða til framfara í skólastarfi.
Skriflegar tilnefningar skulu berast rafrænt á sérstöku eyðublaði til grunnskóladeildar Kópavogs til ragnheidur@kopavogur.is eigi síðar en 4. maí 2015.
Einnig er hægt að tilnefna á vef bæjarins http://www.kopavogur.is/
Sigurvegarar upplestrarkeppni grunnskólanna
Aníta Daðadóttir hreppti 1. sætið í upplestrarkeppni grunnskólanna í Kópavogi og Björn Breki Steingrímsson 2. sætið. Þau eru bæði nemendur í Salaskóla. Þetta er stórglæsilegur árangur hjá þeim enda tóku þátt í keppninni 18 bestu upplesarar í 7. bekk í Kópavogi. Til hamingju með þennan frábæra árangur.
Umbótaáætlun vegna ytra mats
Haustið 2014 gerðu starfsmenn Námsmatsstofnunar úttekt á starfsemi Salaskóla. Þeir þættir sem voru skoðaðir voru stjórnun, nám og kennsla, innra mat og nám nemenda með sérþarfir. Niðurstöður úttektarinnar eru settar fram í skýrslu sem var birt í febrúar 2015 en kynntar starfsfólki í byrjun janúar. Þar eru dregnir fram styrkleikar í starfi skólans og sett fram tækifæri til umbóta.
Matshópur skólans var skipaður upp á nýtt í byrjun janúar og tók þegar til við að vinna að umbótaáætlun út frá þeim ábendingum sem koma fram í skýrslunni. Í hópnum eiga sæti Agnes Þorleifsdóttir, kennari, Berglind Hansen, fulltrúi foreldra, Hafsteinn Karlsson, skólastjóri, Hulda Björnsdóttir, deildarstjóri, Jóhanna Björk Daðadóttir, kennari, Jóhanna Pálsdóttir, kennari, Kjartan Ólafur Gunnarsson, nemandi, Magnús Halldórsson, húsvörður, Margrét Sveinsdóttir, sérkennari, María Helga Gunnarsdóttir, kennari og Matthildur Einarsdóttir, nemandi. Hópurinn fór skipulega í skýrsluna og rýndi sérstaklega í þær ábendingar sem þar koma fram. Hann lauk vinnu við skýrsluna í byrjun mars og á starfsmannafundi 13. mars voru niðurstöður hópsins kynntar og unnið áfram með ákveðna þætti á þeim fundi með svokölluðu kaffihúsafyrirkomulagi.
Umbótaáætlunin sem er nú komin á heimasíðu skólans, er sett upp í töfluformi ásamt tímaramma og ábyrgðaraðilum. Einhver atriði eru tvítekin í úttektarskýrslunni þar sem þau koma fram undir mismunandi matsþáttum. Í umbótaáætluninni er sérhver tillaga til úrbóta úr skýrslunni tekin fyrir í sömu röð og þær eru í skýrslunni. Í einhverjum tilfellum er búið að framkvæma það sem bent er á. Það kemur þá fram í áætluninni. Salaskóli þakkar gott samstarf við þá sem stóðu að og framkvæmdu úttektina. Úttektin er afar gagnleg fyrir skólastarfið og þróun þess.
Fyrstubekkingar buðu foreldrum í heimsókn
Dagurinn hjá fyrstubekkingum í Salaskóla hófst með foreldrasýningu í salnum. Foreldrar mættu í morgunsárið inn í sal og krakkarnir sungu fyrir þau fjölmörg lög undir stjórn Heiðu og Ragnheiðar tónmenntakennara og síðan fóru þau með langt ljóð um dýrin í Afríku með tilheyrandi söng. Salurinn var einmitt skreyttur með þeirra eigin litríku myndum af dýrunum í Afríku. Gaman var að sjá hvað krakkarnir stóðu sig vel og allir voru með. Eftir sýninguna í salnum fóru foreldrar í heimsókn í stofur krakkanna þar sem þeir fengu að skoða hvaða verkefni eru í gangi.
Páskabíngó foreldrafélagsins
Hið geysivinsæla páskabingó foreldrafélagsins verður n.k. þriðjudag, 24. mars, og sem fyrr munum við tvískipta því svona:
1. – 5. bekkur verður frá 17:00 – 19:00
6. – 10. bekkur verður frá 20.00 – 22.00
5. bekkur getur þó valið hvort þau vilja mæta með yngri eða eldri hópnum.
Muna að taka reiðufé með ykkur þar sem engir posar eru á svæðinu. Spjaldið kostar 500 kr og síðan verður 10. bekkur með veitingasölu í fjáröflun. Í boði verður samlokur, kökur, drykkir og fleira, þau eru heldur ekki með posa,
Ef einhver hefur tök á að útvega vinninga í bingóið þá má hinn sami hafa samband við einhvern úr stjórn foreldrafélagsins :), sjá hér http://salaskoli.is/index.php?option=com_content&view=article&id=300&Itemid=194
Sjáið einnig nánar um viðburðinn á facebook – síðu foreldrafélagsins https://www.facebook.com/events/580189758751379/
Allir fóru út að skoða sólmyrkvann
Jafnt nemendur, kennarar sem starfsfólk fóru út að skoða sólmyrkvann í morgun eins og nærri má geta.. Margir voru stórhrifnir en nokkrir höfðu á orði að þetta væri nú ekkert merkilegt. Myndir frá skoðun sólmyrkvans í Salaskóla eru hér.
Hönd í hönd í kringum Salaskóla
Um klukkan 11 þennan morguninn fórum við, nemendur og starfsfólk skólans, út og tókumst í hendur og mynduðum keðju í kringum skólann. Þetta átti að vera táknrænt og við gerðum þetta vegna þess að við erum á móti kynþáttamisrétti. Við ætlum þannig að standa saman um margbreytileika í okkar samfélagi. Það er álit okkar að ekki eigi að mismuna vegna útlits og uppruna. Við erum ólík og eigum að fá að njóta þess. Myndir.
Mynd: Reynir Jónasson