Að undanförnu hefur öryggi barna og unglinga á Netinu mikið verið til umræðu. Þrátt fyrir að margt gott sé að finna á Netinu er þar líka ýmislegt sem þarf að varast og þar geta þrifist hættuleg og neikvæð samskipti. Að þessu tilefni hafa samtökin Heimili og skóli sett af stað vakningarverkefni um jákvæða og örugga notkun barna og unglinga á Netinu. Vakningarverkefnið felst í kynningum fyrir nemendur og foreldra þeirra.´

Í næstu viku verða fundir fyrir nemendur í 5. – 10. bekk hér í Salaskóla og þriðjudaginn 3. mars eru foreldrar boðaðir til fundar kl. 8:00 – 9:00.

Internetið er frábær upplýsingaveita og tæki til samskipta en þar felast einnig ýmsar hættur sem mikilvægt er fyrir foreldra að þekkja og gera sér grein fyrir. Til að foreldrar geti talað við börnin sín og leiðbeint þeim um öryggi og góða hegðun þurfa þeir að þekkja það umhverfi sem þeir eru í dags daglega. Leiðbeiningar um "umferðarreglur" á netinu eru því orðinn einskonar hluti af uppeldishlutverkinu.

Á fyrirlestrinum verður farið í gegnum svipaða hluti og með nemendum, en einnig rætt hvernig foreldrar sjá netnotkun barnanna sinna og svo hvernig börnin upplifa netnotkun sína og samskipti sín við foreldra.  Á fyrirlestrinum verður farið í gegnum bloggsíður, tölfræðilegar upplýsingar, msn einelti, netið og friðhelgi einkalífsins, netvini, nettælingu og ræða aðeins um kynslóðabilið þ.e. hvers vegna foreldrar skilja ekki tölvunotkun barna sinna.

Við hvetjum foreldra til að mæta á þennan fund.

Á öskudag verður skemmtun í Salaskóla fyrir alla krakka í 1. – 7. bekk. Hún hefst kl. 13:00 og lýkur kl. 14:30. Allir eiga að mæta í grímubúningi eða öðruvísi en venjulega. Stiginn verður dans, farið í leiki, valinn frumlegasti búningurinn og svo er hægt að fá andlitsmálun fyrir þá sem vilja.

Að þessari skemmtun standa Foreldrafélagið, Salaskóli og Fönix.

Vetrarleyfi í skólum Kópavogs er mánudaginn 23. og þriðjudaginn 24. febrúar. Þá er skólinn lokaður.

Miðvikudaginn 25. febrúar er skipulagsdagur í Salaskóla og þá eiga nemendur frí, en dægradvölin er opin. Þess má geta að þennan dag verður öskudagsskemmtun í skólanum. Nánar auglýst síðar.

Vegna jarðarfarar Óttars Bjarkan Bjarnasonar húsvarðar verður Salaskóli lokaður frá kl. 13:30 föstudaginn 6. febrúar. Vekjum sérstaka athygli á því að dægradvölin er lokuð. Þeir nemendur í 9. og 10. bekk sem eru í vali í MK fara þangað.

Í dag, miðvikudaginn, 28. janúar, frá kl. 17:30-18:20 er mikilvægur kynningarfundur fyrir foreldra í 2. bekk. Þar verður sagt frá nemendum í 2. bekk sem eru allir á einhverfurófinu.  Við ætlum að kynna hvað einhverfurófið er og hvernig þessir ákveðnu nemendur taka þátt í skólastarfinu með okkur. Foreldrar nemendanna munu kynna þá.

Einnig verða þau úrræði kynnt sem Salaskóli býður upp á fyrir nemendur á yngsta stigi sem þurfa á stuðningi að halda, bæði hvað varðar nám og annað.

Mjög mikilvægt er að allir foreldrar mæti.  Fundurinn er í salnum okkar.

Prófgreinar og prófdagar í 10. bekk grunnskóla vorið 2009 verða sem hér segir:

• Íslenska fimmtudagur 7. maí kl. 9.00-12.00

• Enska föstudagur 8. maí kl. 9.00-12.00

• Stærðfræði mánudagur 11. maí kl. 9.00-12.00

Næstkomandi föstudag, 23. janúar, boða kennarar nemendur sína og foreldra þeirra í viðtöl. Þar er lagt mat á námið og vöngum velt um vorönnina. Kennarar hafa sent foreldrum boð og tímasetningar viðtala liggja fyrir. Kennsla fellur niður þennan dag.

Nú hafa foreldra allra nemenda átt kost á að koma í morgunkaffi hér í Salaskóla á þessu skólaári. Haldnir voru 20 fundir og mættu 413 foreldrar, eða 75% foreldra. 

Í unglingadeild mættu að meðaltali 55% foreldra, á miðstigi mættu að meðaltali 78% foreldra og á yngsta stigi 84% foreldra. Í þeim bekk sem best mæting var mættu foreldrar allra barna en í þeim bekk sem slökust var mæting komu 36% foreldra. Besta mætingin var í lóum, þar var 100% mæting. Steindeplar lentu í 2. sæti með 95% mætingu og mávar í 3. sæti með 90% mætingu.

Við erum að vinna úr matsblöðunum sem foreldrar fylltu út á fundunum. Ljóst er að foreldrar eru mjög ánægðir með skólastarfið og bera mikið traust til kennara. Jafnframt komu fram ágætar ábendingar um það sem betur má fara og eitthvað af tillögum um nýjar leiðir. Skýrslan verður birt á heimasíðunni þegar hún er tilbúin.

Morgunkaffið í Salaskóla hefur öðlast sess í samstarfi skólans við foreldra. Það skilar miklu inn í skólastarfið, byggir upp traust á milli skólans og heimilanna og hjálpar okkur við að byggja upp góðan skóla.