Þessa dagana er vorskóli Salakóla í gangi fyrir verðandi nemendur í 1. bekk. Fyrsti dagurinn var í gær en þá mættu nemendurnir í skólann ásamt foreldrum sínum og hittu kennarana og væntanlega bekkjarfélaga.
Meðan foreldrarnir skutust á fund með skólastjórnendum fóru krakkarnir inn í skólastofu og leystu verkefni og fengu hressingu á eftir. Öll stóðu þau sig með mikilli prýði og við hlökkum til að hitta þennan föngulega hóp aftur í dag sem er síðari dagur vorskólans.
Íslandsmótið í skólaskák 2010 er hafið. Fulltrúar Salaskóla og Kópavogs eru félagarnir Páll Andrason og Eiríkur Örn Brynjarsson. Eftir tvær umferðir leiðir Kjördæmismeistarinn Páll Andrason mótið ásamt tveimur öðrum. Eiríkur Örn hefur einnig blandað sér í toppbaráttuna.
Góðir gestir komu í heimsókn eftir hádegi í dag undir formerkjum Tónlist fyrir alla og buðu nemendum í 1. – 4. bekk upp á að koma í salinn og syngja. Þetta var hljómsveitin Fúsarnir skipuð þremur hljómlistamönnum sem léku undir og sungu lög Sigfúsar Halldósssonar með þáttöku nemenda. Nemendur hafa að undanförnu verið að æfa lög Sigfúsar enda tóku þau vel undir sönginn hjá Fúsunum og höfðu greinilega gaman að. Þarna mátti heyra lög eins og Vegir liggja til allra átta, Dagnýju og Litlu fluguna Slík söngstund léttir lund og er gott innlegg inn í vorið.
Vorskóli Salaskóla verður fimmtudaginn 6. maí og föstudaginn 7. maí. Skólastundin hefst kl. 14:00 báða dagana og er til kl. 15:30. Börnin þurfa ekkert að hafa með sér.
Fyrri daginn verður fræðslufundur fyrir foreldra. Við leggjum áherslu á að báðir foreldrar mæti.
Þeir sem komast af einhverjum ástæðum ekki þessa daga eru vinsamlega beðnir um að láta okkur vita í síma 570 4600.
Árshátíð Fönixar og Salaskóla var haldin í gærkvöldi fyrir unglingadeild og tókst sérlega vel. Krakkarnir komu í sínu fínasta pússi, borðuðu góðan mat saman sem Erik, kokkur skólans, eldaði af miklu listfengi. Hann var síðan borinn var fram af kennurum sem þóttu standa sig nokkuð vel í þjónshlutverkinu. Sýndar voru stuttmyndir sem krakkarnir höfðu tekið sjálf og boðið upp á frábær tónlistaratriði. Árshátíðinni lauk svo með diskóteki. Krakkarnir báru af sér góðan þokka og voru til mikillar fyrirmyndar.
Nemendur margra bekkja eru á fullu í útikennsluverkefnum. Nú er verið að byrja á veðurathugunum í 5. bekk en áður voru þau í ljóðagerð úti í náttúrinni og höfðu m.s. "viðtöl" við steina og plöntur. Lífið vaknar að vori er viðfangsefni fjórðubekkinga en þá fjalla nemendur um á hvern hátt náttúran vaknar til lífsins og kanna m.a. brum trjánna og fuglalífið í nánasta umhverfi. Nemendur í 2. bekk fara svo í fjársjóðsleit þar sem markmiðið er að gera þau meðvituð um samspil fjögurra afla – sólar, vatns, lofts og jarðar.
Í dag kom fulltrúi Rauða krossins í skólann og sótti heim nokkra nemendur, allt stúlkur, sem höfðu valið valgreinina"Textíll til góðs" hluta vetrar. Tilgangur valgreinarinnar var að framleiða barnaföt sem yrðu gefin til styrktar hjálparstarfi Rauða krossins í útlöndum. Þess má geta að leitað var til fyrirtækisins Föndru um styrk sem gaf allt það efni sem saumað var úr.
Afrakstur þessarar fábæru valgreinar, s.s. húfur, buxur, treyjur og barnateppi, var afhentur Rauða krossinum í dag í textílstofu skólans. Nemendur og kennarar fengu mikið lof fyrir flotta vinnu og góðan hug og fræddust um hvernig slíkar gjafir nýtast.
Við samgleðjumst frábærum árangri sem skáksveit Salaskóla náði þegar hún varð Íslandsmeistari grunnskólasveita sem fór fram í Skákhöllinni Faxafeni 12, um helgina. Salaskóli hafði nokkra yfirburði og fékk sveitin 33 vinninga af 36 mögulegum. Sjá nánar um mótið hér.
Myndir frá Íslandsmeistaramóti grunnskólasveita.
Myndir frá Kjördæmamóti Reykjaness.
Einn meðlimur skákksveitarinnar varð síðan kjördæmameistari Reykjaness í eldri flokki í gær en það var Páll Andrason í 10. bekk. Hann tryggði sér sæti á Landsmóti sem fram fer 6.-9. maí næstkomandi í Reykjavík. Birkir Karl í 8. bekk varð í 3. sæti og Baldur Búi í 7. bekk í 4. sæti í yngri flokki. Einstaklega glæsilegur árangur hjá þeim Páli, Birki Karli og Baldri Búa.
Nemendur og starfsfólk samfögnuðu á sal skólans í dag góðum árangri í skák og fimleikum. Eins og fram kemur hér á síðunni vann Tinna Óðinsdóttir Norðurlandameistaratitil í fimleikum á dögunum en að auki náðu Páll og Eyþór Trausti að verða Kópavogsmeistarar í skólaskák í eldri og yngri aldursflokki. Fleiri nemendur stóðu sig afar vel í skólaskákinni bæði á Kópavogsmótinu um helgina og í skákiðkun í vetur. Bikarar voru veittir í öllum aldursflokkum frá 1. bekk til 10. bekkjar. Tíundubekkingurinn Páll Andrason er skákmeistari skólans árið 2010.
Sjá fleiri myndir frá þessari montstund sem var 16. apríl 2010.
